Գյուղոլորտի պատասխանատուներն այցելել են Հադրութի շրջան
15/06/2019
Հունիսի 14-ին ԱՀ գյուղատնտեսության նախարար Ժիրայր Միրզոյանը, ուղեկցությամբ փոխնախարար Համլետ Ապրեսյանի և ԱՀ գյուղի և գյուղատնտեսության աջակցության հիմնադրամի տնօրեն Տիգրան Ծատրյանի, այցելել է Հադրութ, որտեղ շրջվարչակազմի ղեկավարության հետ անց է կացվել խորհրդակցություն՝ նվիրված բերքահավաքին, հակահրդեհային միջոցառումներին և գյուղոլորտի ընթացիկ այլ խնդիրներին: Բերքահավաքը ողջ թափով ընթացքի մեջ է, ներգրավված է համապատասխան քանակությամբ տեխնիկա, որի բաշխվածությունը, ինչպես ընդգծեց Ժ. Միրզոյանը, անհրաժեշտ է կազմակերպել առավելագույնս արդյունավետ կերպով, որպեսզի գյուղատնտեսական կարևորագույն միջոցառումը շրջանում անցկացվի անկորուստ և անհրաժեշտ ժամկետներում: 
Մթերման խնդիր ևս չկա, աշխատանքները կազմակերպված են հավուր պատշաճի: Քննարկվեցին նաև ոռոգման, շրջանում այգեգործության զարգացման նպատակով անհրաժեշտ տնկիների տրամադրման հետ կապված հարցեր ևս: Առանձին անդրադարձ եղավ Հադրութի շրջանում անասնաբուծության զարգացման նպատակով անասնավարկերի տրամադրմանը, կարևորվեց ԳԳԱՀ-ի հետ շրջանի ղեկավարության սերտ համագործակցության անհրաժեշտությունը: Արդյունավետության ապահովման համար, նշեց ԳԳԱՀ տնօրեն Տ. Ծատրյանը, շատ կարևոր է վարկավորման, տրամադրվող վարկային միջոցների տնօրինման վերահսկողության իրականացումը: Օրվա երկրորդ կեսին Արցախի գյուղոլորտի պատասխանատուներն այցելեցին ԳԳԱՀ-ի՝ Հադրութի շրջանում տեղակայված մթերման կետ, որտեղ իրականացվում է հացազգի մշակաբույսերի բերքի մթերումը:
