Ցանքաշրջանառությունը՝ պարտադիր պայման (Նախարար Ժիրայր Միրզոյանն այցելեց Մարտունի և Մարտակերտ) 07/12/2018
Հանրապետության շրջաններ կատարվող այցերի շրջանակում դեկտեմբերի 5-ին ԱՀ գյուղատնտեսության նախարար Ժիրայր Միրզոյանի գլխավորած պատվիրակությունը, որի կազմում էին նախարարի տեղակալները, նախարարության ստորաբաժանումների ղեկավարներ և ԱՀ գյուղի և գյուղատնտեսության աջակցության հիմնադրամի տնօրեն Տիգրան Ծատրյանը, եղավ Մարտունիում: Այստեղ Արցախի գյուղոլորտի պատասխանատուները մասնակցեցին շրջանի խորհրդի նիստին:
Ժիրայր Միրզոյանը ներկայացրեց գյուղոլորտում իրականացվող աշխատանքների մասին, ինչպես նաև կատարեց անդրադարձ առաջիկա անելիքներին և ոլորտի զարգացման հեռանկարներին:
Ինչպես նախորդող օրերին Հադրութ և Քաշաթաղ կատարված այցերի ժամանակ էր, Ժիրայր Միրզոյանը ներկաների հետ քննարկեց գարնանացանի նախապատրաստական աշխատանքներին վերաբերվող հարցեր՝ կարևորելով անհրաժեշտ սերմերի վերաբերյալ հայտերը ժամանակին ներկայացնելը: Իսկ սերմերը կտրամադրվեն առանց դրանց քանակի սահմանափակման: Անհրաժետ է ուշադրություն դարձնել ներկայացվող ցուցակների ճշգրտությանը: Մենք պարտավոր ենք ավելի ուշադիր լինել պարարտանյութերն օգտագործելիս: Այս ուղղությամբ կուժեղացվի վերահսկողությունը. կիրականացվի հողերի ագրոքիմիական անալիզ, և պարտադիր կդառնա պարարտանյութերի օգտագործման անհրաժեշտության հիմնավորումը, նշեց Ժ. Միրզոյանը:
Նորից ընդգծվեց պարտադիր ցանքաշրջանառության կիրառման անհրաժեշտությունը: Հենց այս հանգամանքն էլ պայման կհանդիսանա հողօգտագործողին պետական աջակցություն տրամադրելու համար: Առաջիկայում կվերանայվի համայնքները սպասարկող գյուղատնտեսների գործառույթների շրջանակը: Պետք է հողօգտագործողների հետ կառուցել ճիշտ հարաբերություններ, իրականացնել անհրաժեշտ խորհրդատվություն, տանել բացատրական աշխատանք:
Պետական աջակցությունը, այդ թվում և լայնորեն տրամադրվող նորագույն տեխնոլոգիաները պետք է ծառայեն գյուղոլորտի զարգացմանը: Նախարարությունը ցուցաբերում է լայն աջակցություն, բայց այն պիտի նպաստի նրան, որ գյուղատնտեսությունը դառնա արդյունաբերություն: Անարդյունավետ և չհիմնավորված ծախսերից անհրաժեշտ է խուսափել:
Ոռոգման համակարգերի բարելավումը պետք է նաև արտահայտվի դրանց արդյունավետ օգտագործմամբ: Խորքային հորերի հորատումը շրջանում շարունակական կլինի, սակայն դա պիտի զուգակցվի նրանց շուրջը բուսաբուծության զարգացմամբ, նշեց նախարարը:
Ժիրայր Միրզոյանը հանգամանալից կերպով անդրադարձավ նաև անասնաբուծության և անասնաբուժության ոլորտների խնդիրներին:
Նախարարն անդրադարձավ նաև սննդամթերքի անվտանգության, շրջանում այգեգործության զարգացման, անասնաբուծության ոլորտի կարգավորման և այլ հարցերի, ինչից հետո պատասխանեց առաջադրված ավելի քան երեք տասնյակ հարցերի:
Հաջորդ օրը՝ դեկտեմբերի 6-ին, Ժիրայր Միրզոյանի գլխավորած պատվիրակությունն այցելեց Մարտակերտ, որտեղ շրջանի ղեկավարության և համայնքապետերի հետ քննարկվեցին գյուղոլորտին վերաբերող հարցերի լայն շրջանակ: Առանձին ելույթով հանդես եկավ ԱՀ ԳՆ ՍԱՊԾ պետ Արթուր Ներսիսյանը:
Խորհրդակցության ավարտից հետո նախարարն իրականացրեց աշնանացած տարածքների դիտարկում:
