Նախարար Անդրանիկ Խաչատրյանն ընդունեց հոլանդացի մասնագետներին
29/06/2012
Հանրապետությունում անասնապահության զարգացմանն ուղղված` գյուղնախարարության կողմից իրականացվող ծրագրերի արդյունավետությունը կայանում է ոչ միայն արտասահմանից բարձր ցեղայնության տոհմային անասունների ներկրմամբ, այլև,որ ոչ պակաս կարևոր է, դրանց խնամքի պայմանների տիրապետման գործում ֆերմերներին մասնագիտական, խորհրդատվական աջակցությամբ: Այս ուղղությամբ ևս զգալի աշխատանքներ են կատարվում: Գյուղնախարարության համակարգի մասնագետների կողմից շրջաններում պարբերաբար սեմինար խորհրդակցությունների անցկացմանը զուգահեռ արտասահմանից ևս հրավիրվում են փորձառու մասնագետներ:
Գյուղնախարարության և GARD ագրոսերվիս ընկերության միջ և դեկտեմբերին կնքված փոխըմբռնման հուշագրի համապատասխան դրույթի համաձայն, հանրապետությունում պարբերաբար արտասահմանյան մասնագետների այցելություններ են տեղի ունենում: Այդպիսի մի հերթական աշխատանքային այց էլ կազմակերպվեց հունիսի 21-ից 27-ը, որի ընթացքում Հոլանդիայից ժամանած փորձառու մասնագետներ Վիմ Դե Յոնգը և Ռոբերտ Բաքը եղան Խնապատ և Նորագյուղ համայնքներում տեղակայված տոհմային կայաններում: Հնգօրյա դիտարկումներից ու ուսումնասիրություններից հետո ԳԳԱ հիմնադրամում գյուղնախարարության կողմից հրավիրված սեմինար-խորհրդակցությունում, նրանք իրենց զեկույցներում նշեցին առկա թերությունների ու բացթողումների մասին: Խորհրդակցության մասնակից ֆերմերներն ու անասնապահության համակարգի աշխատողները նրանցից ստացան իրենց հուզող հարցերի պատասխանները:
Իսկա ահա հունիսի 27-ին արտասահմանյան մասնագետներին ընդունեց նախարար Անդրանիկ Խաչատրյանը: Արտահայտելով իր գոհունակությունը հյուրերի այցելության և նրանց կատարած աշխատանքների նկատմամբ, նախարարը կարևորեց այդպիսի այցելությունների շարունակականությունը, անհրաժեշտ համարելով և նշելով, որ նրանց առաջավոր փորձին տեղում ծանոթանալու նպատակով արցախցի մասնագետները ևս փոխայցելություն կատարեն :
Այնուհետև հոլանդացի մասնագետները և GARD ագրոսերվիս ընկերության ներկայացուցիչ Արման Օհանյանը նախարարին ներկայացրեցին անասնապահական համալիրներում իրենց կողմից կատարած ուսումնասիրություններն ու դիտարկումները, ինչպես նաև` նախօրեին կայացած խորհրդակցության արդյունքները:
Քննարկվեցին նաև մի շարք այլ հիմնահարցեր, որոնց լուծմամբ է պայմանավորվում անասնապահության ու երկրագործության համաչափ զարգացումը` սննդի ու պարենային անվտանգության տեսանկյունից:
