Ողջունելով ներկաներին, նախարարը շնորհակալություն է հայտնել հյուրերին մշտապես Արցախի կողքին լինելու համար, ընդգծելով, որ միմիայն համատեղ ուժերով հնարավոր կլինի վերականգնել Արցախի տնտեսությունը:

Երկուստեք քննարկվել են Արցախի Հանրապետությունում համատեղ սերմարտադրության իրականացման հնարավորությունները, ինչպես նաև ԱՀ սերմերի մատակարարման վերաբերյալ հարցեր. առաջնային սերմնարտադրություն, շղթայական սերմնարդրության մեխանիզմի ներդրում, նոր՝ չորադիմացկուն հատիկաընդեղեն մշակաբույսերի սերմերի արտադրություն:

Հատկանշական է, որ 2020-2021 թվականներին «Գյումրիի սելեկցիոն կայան» գիտաարտադրական ՓԲԸ-ն Արցախի Հանրապետություն է մատակարարել 100 տոննայից ավել էլիտա վերարտադրության սերմեր:

Նախարարն անդրադարձել է նաև Ընկերության՝ «կովկասյան գորշ» տեսակի ԽԵԿ ցեղի բարելավմանն ուղղված երկարամյա փորձին, կիսվել Արցախում այս ոլորտում ունեցած փորձով (ԱՀ-ում տեղական նախրի բարելավումն իրականացվում է շվից, ֆլեգվի, ջերսեյ ցեղերի ԽԵԿ հետ խաչասերմամբ):

Անդրադառնալով ՍՕԱՐ-Հայաստան բարեգործական հիմնադրամի կողմից սոցիալական ուղղվածություն ունեցող ծրագրերի իրականացմանը, Նորայր Մուսայելյանը հատուկ ընդգծել է նման նախաձեռնությունների կարևորությունը (հիմնադրամը աջակցություն է ցուցաբերում Արցախի շրջաններից շուրջ 12 անապահով ընտանիքի՝ անասունների, ընտանի թռչունների և անասնակերի, մասնագիտական վերապատրաստման հնարավորության ընձեռնման, մասնագիտական գործիքների տրամադրման տեսքով), քանի որ դրանք մեծապես նպաստում են ընտանիքների ֆինանսական կայունության ու բարեկեցության ապահովմանը։

Հանդիպմանը մասնակցել են նաև ԱՀ գյուղատնտեսության նախարարի տեղակալներ Վ. Ավետիսյանը, Տ. Առստամյանը, ԱՀ ԳԳԱՀ փոխտնօրեն Վ. Ղազարյանը: