Գյուղնախարարն աշխատանքային այցով եղել է Հադրութի շրջանում
20/08/2019
Օգոստոսի 20-ին «Երեմյան փրոջեքթս» ընկերության հետ ձեռք բերված պայմանավորվածության համաձայն, ԱՀ գյուղատնտեսության նախարար Ժիրայր Միրզոյանը Հադրութի շրջվարչակազմի շենքում հանդիպել է շրջանի համայնքների ղեկավարներին և նրանց ուշադրությանը ներկայացրել Արցախում գործարքվելիք նոր ծրագրի մանրամասները՝ զինված ուժերում սննդի կազմակերպման գործընթացը մասնավոր հատվածին հանձնարարելու վերաբերյալ:
Ժիրայր Միրզոյանն ընդգծել է, որ սա բացառիկ հնարավորություն է տեղական արտադրանքի իրացման համար, հավելելով միաժամանակ, որ սա նաև նոր մարտահրավեր է արցախյան հողօգտագործողի համար, քանի որ վերը նշված ընկերությունը գնելու է միմիայն բարձրորակ գյուղմթերք: Նախարարը հորդորել է ներկաներին հատուկ ուշադրություն դարձնել արտադրանքի որակական հատկանիշներին և ապրանքային տեսքին, քանի որ ժամանակակից շուկայում մթերքի իրացումը պայմանավորված է վերջինիս մրցունակությամբ:
Հանդիպման ընթացքում գյուղնախարարը համայնքների ղեկավարներին է ներկայացրել գարնանացանի աշխատանքների պլանավորման նոր ժամանակացույցը, ըստ որի` շրջանները գարնանացանի տարածքների, մշակաբույսերի տեսականու և սերմերի քանակների վերաբերյալ հայտերը գյուղնախարարություն պետք է ներկայացնեն օգոստոս-սեպտեմբեր ամիսներին, որպեսզի սերմերի ներկրումն ապահովվի ընթացիկ տարվա հոկտեմբերին:
Խոսվել է Հադրութի շրջանի Ուխտաձոր համայնքի և Արաքսի հովտի վարելահողերի, ինչպես նաև խորքային հորերի հնարավորությունների լիարժեք օգտագործման կարևորության մասին:
Հատուկ անդրադարձ է կատարվել անասնապահության ոլորտի խնդիրներին: Նախարարը հերթական անգամ հորդորել է համայնքների ղեկավարներին տեղերում ներկայացնել անասնապահությանը ներկայացվող պարտադիր պահանջները, խստիվ արգելել անասունների բաց պահվածքը, ինչը պատճառ էր դարձել վերջերս Հադրութի շրջանի Մոխրենես համայնքում խոզերի «աֆրիկական ժանտախտ» հիվանդության բռնկման ու անասնագլխաքանակի անկման:
Հանդիպման վերջում նախարարը պատասխանել է համայնքների ղեկավարների բարձրացրած հարցերին:
