ԻՆՉՊԵ՞Ս ԱՇՆԱՆԱՑԱՆ ՑՈՐԵՆԻՑ ՍՏԱՆԱԼ ԲԱՐՁՐ ԲԵՐՔ
29/03/2018
Աշնանացան ցորենի առատ և բարձրորակ բերք կարելի է ստանալ միայն այն դեպքում, երբ ժամանակին և համապատասխան չափաբաժնով իրականցվել է բույսերի ազոտական սնուցումը: Ազոտական սնուցման ամենատարածված եղանակը համարվում է ամոնիակային սելիտրայով արմատային սնուցումը, սակայն ոչ միշտ է հնարավոր լինում ժամանակին իրականացնել նշված միջոցառումը: Հետագայում բաց թողնվածը լրացնելու համար կարելի է կատարել բույսերի տերևային սնուցում` կարբամիդով: Կարբամիդն արժեքավոր ազոտական պարարտանյութ է, որը պարունակում է 46 % ազոտ /N/:
Կարբամիդն արժեքավոր է նրանով, որ բույսերի հետ շփման ժամանակ այրվածքներ չի առաջացնում, բարենպաստ է ազդում հատիկի որակական հատկանիշների վրա, բարձրացնում է հատիկում սոսնձանյութի քանակությունը և, ի տարբերություն մյուս ազոտական պարարտանյութերի, կարբամիդը կարելի է օգտագործել նաև ջրում լուծված վիճակում:
Արտարմատային սնուցումը կարբամիդի կիրառման կարևոր եղանակներից է: Սնուցումը կատարվում է հատկապես այն դեպքում, երբ անհրաժեշտ է բույսերի ազոտային սննդառության վրա արագ ներգործություն: Կարբամիդի օգտագործման նորմաները պայմանավորված են հողի բերրիությամբ և սպասվելիք բերքով: Խորհուրդ է տրվում աշնանացան ցորենի տերևային սնուցման համար օգտագործել 20 կգ/հա կարբամիդ (բանվորական հեղուկը վերցնել 300լ): Եթե բույսերը ապահովված են բավարար քանակությամբ ազոտով, ապա կարբամիդով սնուցումը խորհուրդ է տրվում իրականցնել ծաղկումից հետո, հատիկալիցի (կաթնային հասունացման) փուլում, իսկ եթե բույսերի մոտ առկա է ազոտի պակաս, անհրաժեշտ է սնուցումն իրականցնել մինչև ծաղկումը:Աշնանացան ցորենի այն ցանքերում, որտեղ ժամանակին և համապատասխան չափաքանակով կատարվել է ազոտական սնուցում, կարելի է կարբամիդն օգտագործել 10 կգ/հա նորմայով: Կարբամիդի ճիշտ օգտագործման պայմաններում ակնկալվում է բերքի հավելում մինչև 30 %:
Առհասարակ, կարբամիդը կիրառվում է բոլոր հողերում, բոլոր տեսակի մշակաբույսերի պարարտացման համար` հող մտցնելով արմատային սնուցմամբ, նաև պեստիցիդների հետ խառնելով, որպես տերևային սնուցում, ինչպես նաև՝ որպես կանխարգելիչ միջոց ազոտական քաղցի դեմ:
