Շրջայց
06/06/2019
Հունիսի 5-ին ԱՀ ԳՆ աշխատակազմի գյուղատնտեսական տեխնիկայի պետական տեսչության մասնագետները եղել են հանրապետության Քաշաթաղի և Հադրութի շրջաններում՝ բերքահավաքի ընթացքում գյուղտեխնիկայի շահագործման կանոնների պահպանումը ստուգելու և անվտանգության՝ հատկապես հակահրդեհային կանոնները հրահանգավորելու նպատակով: Ստուգումների արդյունքում արձանագրվել են հացահատիկային կոմբայնների երկարամյա շահագործման հետևանքով առաջացած մաշվածության դեպքեր, ինչը մեծացնում է հնձի ժամանակ հատիկի կորստի հավանականությունը, ուստի ֆերմերներին հանձնարարվել է լինել ուշադիր և մեխանիզատորների հետ համատեղ ժամանակին վերացնել առաջացած անսարքությունները:
Այցի ժամանակ արձանագրվել են նաև մի շարք գյուղատնտեսական տարածքներում հացահատիկահավաք կոմբայնների սակավության դեպքեր. նման խնդիրները սովորաբար լուծվում են այլ տարածքներից կոմբայնների ներգրավմամբ՝ բերքահավաքը կարճ ժամկետներում և անկորուստ իրականացնելու նպատակով: 
Այսպիսի իրավիճակները վերահսկելու տարբերակը, ըստ գյուղտեխնիկայի տեսչության ներկայացուցիչների, հողօգտագործողների ու կոմբայնավարների միջև ժամանակին պայմանավորվածության ձեռքբերումն է: Վերջինիս արդյունավետության մասին վկայում է այն փաստը, որ ցանքատարածությունների յուրաքանչյուր հեկտարից առավելագույն բերքատվության ցուցանիշ է գրանցվում այն տնտեսություններում, որտեղ մեխանիզատորները առաջնորդվում են ագրոնոմների ու տնտեսագետների մասնագիտական խորհրդատվությամբ ու ցուցումներով:
Շրջայցի ընթացքում խոսվել է անկորուստ և բարձրորակ հացահատիկի ստացման նախապայմանների՝ բերքահավաքի սեղմ ժամկետներում կազմակերպման ու բերքահավաքի մեքենաների ու գործիքների արդյունավետ օգտագործման կարևորության մասին:
