Օրգանական պարարտանյութ՝ արդյունավետ ու շահավետ
20/09/2018
Սեպտեմբերի 20-ին ԱՀ գյուղատնտեսության նախարարությունում կազմակերպվել է սեմինար, որի ընթացքում արցախցի մի խումբ գյուղատնտեսներ և հողօգտագործողներ ծանոթացել են «Էկո Պլանտ» գյուղատնտեսության զարգացման հասարակական կազմակերպության կողմից առաջարկվող «Ֆուլվիտ» կենսախթանիչ հեղուկ պարարտանյութին, որի հումքը հանդիսանում է գոմաղբը:
ԱՀ գյուղատնտեսության նախարարի տեղակալ Վիլեն Ավետիսյանը, նախ, ողջունել է հանդիպման մասնակիցներին ու ընդգծել Արցախում օրգանական գյուղատնտեսությամբ զբաղվելու անհրաժեշտության ու կարևորության մասին:
Այնուհետև ՀԿ տնօրեն Արգամ Անթանյանը մանրամասնորեն ներկայացրել է օրգանական պարարտանյութի առանձնահատկությունները և բացատրել, որ արտարմատային մեթոդով օրգանական բաղադրիչով սնուցումն առավել արդյունավետ ու տնտեսապես շահավետ է:
«Օրգանական պարարտանյութը լայն տարածում ունի բազմաթիվ երկրներում, իսկ Հայաստանում այն (ֆուլվիտ) արդեն իսկ փորձարկվել է 370 հեկտար տարածքների վրա՝ 24 տեսակի մշակաբույսերի համար»,- նշել է ՀԿ տնօրենը՝ հավելելով, որ տվյալ պարարտանյութի օգտագործումը խթանում է բույսերի ավելի վաղ հասունացմանն ու բերքատվությանը, իսկ ստացված բերքն ունենում է որակական բարձր ցուցանիշներ:
Հանդիպման ընթացքում մասնակիցներն ուղել են իրենց հետաքրքրող հարցերն ու ստացել սպառիչ պատասխաններ: Իսկ արդեն հանդիպման ավարտին բոլոր ցանկացողներին աշնանացան ցորենի ախտահանմանը զուգահեռ այն փորձնական օգտագործելու համար տրամադրվել են տվյալ օրգանական պարարտանյութից:
