|
Եղանակի տեսությունը  |
ՕՐԳԱՆԱԿԱՆ ԳՅՈՒՂԱՏՆՏԵՍՈՒԹՅՈՒՆԸ ՑԱՆԿԱԼԻ ՀԵՌԱՆԿԱՐ
30/10/2015
Օրգանական գյուղատնտեսությունը գյուղատնտեսության յուրահատուկ ճյուղ է, որն առավելապես ներդաշնակ է ագրոէկոհամակարգերին և իրականացվում է տեխնիկական կանոնակարգերի և նորմատիվ այլ փաստաթղթերի պահանջներին համապատասխան: Օրգանական գյուղատնտեսությունն այնպիսի մի համակարգ է, որտեղ չեն կիրառվում տոքսիկ նյութեր, կայուն պեստիցիդներ, քիմիական պարարտանյութեր: Հողի նկատմամբ հատուկ վերաբերմունքն օրգանական գյուղատնտեսության հիմքն է: Հողը պարարտացնում են ոչ թէ բույսերին սննդով ապահովելու, այլ հողային մանրէներին կերակրելու համար: Հողի պոտենցիալ բերրիությունը կախված է հողում հումուսի քանակից, որն էլ գոյանում է բույսերի և կենդանիների մնացորդների քայքայման գործընթացում: Վերջին հետազոտությունները ցույց են տալիս, որ հողերի` հանքային պարարտանյութերով պարարտացումը բերում է հողում հումուսի հանքայնացմանը: Օրգանական սննդամթերքը դրական ազդեցություն ունի մարդու առողջության վրա: Տարբեր ուսումնասիրություններ ցույց են տվել, որ օրգանական մթերքում սննդարար նյութերի քանակությունը 3 անգամ շատ է, քան ինտենսիվ` պեստիցիդների և հանքային պարարտանյութերի կիրառմամբ աճեցրած բերքի մեջ, քանի որ ավանդական եղանակով աճեցված բերքում առկա է պեստիցիդների մնացորդային քանակություն: Անկախ նրանից, թե ինչ ազդեցություն ունեն այդ քիմիական նյութերը մարդու առողջության վրա, ճշմարտությունն այն է, որ մեր օրգանիզմը դրանց ադապտացված չէ: Հազարամյակներ շարունակ մարդ արարածը սնվել է թարմ, մաքուր սննդամթերքով, բայց հանկարծ սկսում է սնվել տարբեր վնասակար նյութերով: Հիվանդությունների տարեցտարի աճող քանակն արդեն իսկ վկայում է այդ մասին: Ուստի, ելնելով մարդու առողջության պահպանման հիմնախնդրի առաջնահերթությունից, օրգանական գյուղատնտեսության զարգացումն ուղղակի անհրաժեշտ է դառնում: Բացի վերը նշված առավելություններից, օրգանական գյուղատնտեսությունը կարելի է որակել նաև որպես տնտեսության բավականին շահութաբեր ճյուղ: Արտասահմանյան փորձը ցույց է տալիս, որ օրգանական գյուղմթերքների արտադրությամբ զբաղվող ֆերմերները երբևիցե չեն առնչվում դրանք իրացնելու խնդրի հետ, ավելին, այդպիսի եղանակով աճեցված մթերքների գները մի քանի անգամ գերազանցում են ինտենսիվ եղանակով ստացված մթերքի գինը: Ակնհայտ է, որ մեր երկրում առկա է օրգանական գյուղատնտեսության զարգացման համար մեծ ներուժ: Արցախը գտնվում է ծովի մակերևույթից միջինը 1100 մ բարձրության վրա և աչքի է
Արցախում կան բազմաթիվ հողօգտագործողներ, որոնց արտադրանքը գրեթե օրգանական է: Այդ արտադրանքն էկոլոգիապես մաքուր է այն պարզ պատճառով, որ, հնարավորություն չունենալով գնել հանքային պարարտանյութեր և պեստիցիդներ, հողօգտագործողը բավականին երկար ժամանակ հողը մշակել է օրգանական եղանակով: Արցախի Հանրապետությունում չկան խոշոր արտադրական տարածքներ` վնասակար արտանետումներով, տարածաշրջանում առկա է անարատ բնություն (մաքուր օդ, ջուր, հող), բացակայում են միջպետական տարանցիկ ճանապարհները, ինչը նույնպես օրգանական մթերքի արտադրության գլխավոր նախապայմաններից է: Սյուզաննա Սարգսյան ԼՂՀ ԳՆ բուսաբուծության և բույսերի պաշտպանության բաժին
|
