Քննարկվեց ոլորտին վերաբերվող հարցերի լայն շրջանակ
21/11/2019
Արցախի Հանրապետության գյուղատնտեսության նախարար Ժիրայր Միրզոյանը, ուղեկցությամբ նախարարի տեղակալներ Տիգրան Առստամյանի, Վիլեն Ավետիսյանի, ԳՆ սննդամթերքի անվտանգության պետական ծառայության պետ Արթուր Ներսիսյանի և նախարարի խորհրդական Միքայել Սողոմոնյանի, այցելել է Բերձոր, որտեղ մասնակցել է Քաշաթաղի շրջանի վարչակազմի նիստին: Շնորհավորելով նորընտիր համայնքապետերին ընտրվելու և վերընտրվելու կապակցությամբ՝ Ժիրայր Միրզոյանն ընդգծեց, որ գյուղատնտեսության վարման գործում նրանց դերը խիստ մեծ է, և անհրաժեշտ է առանձնահատուկ ուշադրություն ցուցաբերել գյուղոլորտի լիազորություններին և պարտականություններին:
Իր ելույթում Ժիրայր Միրզոյանն անդրադարձել է անասնաբուծությանը, հատկապես՝ խոզաբուծության և մեղվաբուծության խնդիրներին, ինչպես նաև՝ այգեգործության և դաշտավարության ոլորտներում անհրաժեշտ, պարտադիր ագրոմիջոցառումներին:
Շրջանը մեծ ներուժ ունի անասնաբուծության զարգացման առումով: Բայց այս ճանապարհին անհրաժեշտ է կարգավորել մի շարք հարցեր, նշեց նախարարը՝ հավելելով, որ արմատապես պիտի փոխվի վերաբերմունքը գործի նկատմամբ. գյուղատնտեսական կենդանիների խնամքի և պահվածքի հետ կապված խնդիրներն ասվածի վկայությունն են: Անհրաժեշտ է նաև իրականացնել կենդանիների հաշվառում, առանձնահատուկ ուշադրություն դարձնել անասնագլխաքանակի տեղաշարժին:
Գյուղատնտեսության համակողմանի զարգացումը կբերի մրցունակ արտադրանքի թողարկմանը: Սա հատկապես ձեռնտու է տնտեսավարողին: ԱՀ ԳԳԱՀ-ն պատրաստ է արտոնյալ կերպով վարկավորել բոլոր նրանց, ովքեր պատրաստակամություն ունեն զբաղվել գյուղմթերքի վերամշակմամբ:
Գյուղատնտեսության զարգացման գործում ունեցած նշանակալի ավանդի համար և գյուղատնտեսության աշխատողի օրվա առթիվ նախարարը Քաշաթաղի շրջանի վարչակազմին պարգևատրեց «Գյուղատնտեսական նվաճումների համար ոսկե մեդալ»-ով՝ իր գոհունակությունը հայտնելով շրջանի ղեկավարության և գյուղատնտեսության պատասխանատուների աշխատանքից:
Վարչակազմի նիստում առանձին ելույթով հանդես եկավ նաև ԳՆ ՍԱՊԾ պետ Արթուր Ներսիսյանը:
Օրվա երկրորդ կեսին Ժիրայր Միրզոյանն այցելել է Շուշիի շրջան, որտեղ այս տարի պետական ծրագրով մեկնարկել են գյուղատնտեսական երկու կոոպերատիվների հիմնադրման աշխատանքները: Եղծահողում հիմնադրված «Դաշտահող» կոոպերատիվն Աստրախանի մարզից ԳԳԱՀ օժանդակությամբ արդեն ձեռք է բերել անասունների առաջին խմբաքանակը:
Այնուհետև նախարարն ու նրան ուղեկցող գյուղոլորտի պատասխանատուներն այցելել են Շուշիի շրջանի արոտավայրեր, որտեղ իրականացվել է «Անասնաբուծության կանոնակարգում և արոտների կառավարում» ծրագրի իրականացման աշխատանքները:
