ՏՐԱՄԱԴՐՎԵԼ Է ՏՈՀՄԱՅԻՆ ՑՈՒԼԵՐԻ ՀԵՐԹԱԿԱՆ ԽՄԲԱՔԱՆԱԿԸ
09/06/2016
Տեղական նախրի մթերատվության բարձրացման նպատակով, օրերս ֆերմերներին է հանձնվել տոհմային ցուլերի հերթական խմբաքանակը:
Այս տարվա ընթացքում արդեն տրամադրվել են 73 գլուխ տոհմային ցուլեր, իսկ 2011 թվականից առայսօր արտոնյալ պայմաններով տրամադրվել են շուրջ 400 գլուխ տոհմային ցուլեր:
Անասնաբուծության ոլորտում սա հաջողված և հեռանկարային ծրագիր է համարվում, ու արդյունքներն էլ շոշափելի են. եթե 2011 թվականին մի կովի կաթնատվությունը հասնում էր 1961 կգ, ապա 2015 թվականին այն արդեն հասցվեց 2148 կգ-ի: Իհարկե, այդ բոլորը չի կարելի վերագրել միայն այդ ծրագրին, որովհետև, դրան զուգահեռ, անց են կացվել ու շարունակվում է իրականացվել նաև արհեստական սերմնավորման և կերային բազայի բարելավման աշխատանքներ: 
Հավելենք, որ տեղական նախրի մթերատվության բարձրացման նպատակով՝ տրամադրվում են տոհմային ցուլեր՝ արժեքի 50% սուբսիդավորմամբ, հինգ տարի մարման ժամկետով և երեք տարի պարտադիր պահելու պայմանով: Տոհմային ցուլերից և տեղական կովերի տրամախաչման արդյունքում ծնված խառնածինները աչքի են ընկնում բարձր մթերատու հատկանիշներով:
Ինչպես նշեց ԼՂՀ գյուղատնտեսության նախարարության անասնաբուծության և անասնաբուժության վարչության պետ Նորայր Մուսայելյանը, աշխատանքներ են տարվում նախիրը որակապես փոխելու ուղղությամբ, որը հաջողությամբ է իրականացվում:
