|
Եղանակի տեսությունը  |
ՍՏԵՓԱՆԱԿԵՐՏՈՒՄ ԱՆՑԿԱՑՎԵՑ ՄԵՂՎԱԲՈՒԾՈՒԹՅԱՆ ՈԼՈՐՏՈՒՄ ՆՈՐԱԳՈՒՅՆ ՏԵԽՆՈԼՈԳԻԱՆԵՐԻ ՆԵՐԴՐՄԱՆԸ ՆՎԻՐՎԱԾ ՆԵՐԿԱՅԱՑՈՒՑՉԱԿԱՆ ՑՈՒՑԱՀԱՆԴԵՍ-ԿՈՆՖԵՐԱՆՍ
31/01/2017 ԼՂՀ գյուղատնտեսության նախարար Արամ Մխոյանը բացման խոսքում անդրադարձավ գյուղատնտեսական մթերքների, մասնավորապես, մեղվաբուծական մթերքների արտադրությունը ժամանակակից պահանջներին համապատասխանեցնելու անհրաժեշտությանը և հույս հայտնեց, որ միջոցառումը հիմք կհանդիսանա Արցախում մեղվաբուծության հետագա զարգացման համար: Նա նշեց, որ չնայած ժամանակի հետ, պայմանավորված նաև ոլորտի նկատմամբ պետական հոգածությամբ, մեր գյուղատնտեսության համախառն արտադրանքում ավելանում է մեղրի տեսակարար կշիռը, այնուամենայնիվ, ոլորտը դեռ զարգանալու տեղ ունի, արտադրվող 300-350 տ արտադրանքը կարող է բավարարել միայն ներքին շուկայի պահանջարկը, այնինչ, մեղվաբույծների մեծ մասը լուրջ նկրտումներ ունի սեփական արտադրանքն արտաքին շուկա հանելու: Իսկ դրա համար, նշեց Արամ Մխոյանը, մեղվաբուծության ժամանակակից փորձին հետևելն այլընտրանք չունի: -Ժամանակի հետ անհրաժեշտություն է առաջանում մեր կողմից արտադրված մեղվաբուծական ապրանքների տեսականին հանել արտաքին շուկա: Իսկ դրան նախապատրաստվել է պետք. ապրանքատեսքը պետք է համապատասխանի այսօրվա միջազգային չափորոշիչներին: Ավանդական ձևով տարաներով մեղրի վաճառքը չի կարող մեզ հնարավորություն տալ ինտեգրվելու միջազգային շուկային, բայց արտադրանքը ժամանակակից տեսքի բերելու պարագայում, իրացումն արդեն ավելի արդյունավետ կդառնա: Այս կոնֆերանսի նպատակն էլ հենց այն է, որ մեր արտադրողները կարողանան իրենց արտադրանքը ժամանակակից չափորոշիչներին համապատասխան տեսքի բերել ու անցնել միջազգային շուկա,- եզրափակեց Արամ Մխոյանը:
Կոնֆերանսի մասնակիցներին ներկայացվեց նաև մեղվանոցի անձնագիրն ու նրա լրացման կարգը: |
