Սեմինար-խորհրդակցություն ԱՀ ԳՆ ՀԱՍՓԼ-ում
08/02/2018
Փետրվարի 8-ին ԱՀ ԳՆ «Հանրապետական անասնաբուժական և սննդամթերքի փորձաքննությունների լաբորատորիա» (ՀԱՍՓԼ) ՊՈԱԿ-ում կազմակերպվել է սեմինար-խորհրդակցություն՝ նվիրված բրուցելյոզ հիվանդության ախտորոշման մեթոդների առանձնահատկությանը, որին մասնակցում էին շրջանային անասնաբուժական սպասարկման կայաններից ժամանած շիճուկաբաններ և ուսանողներ Շուշիի տեխնոլոգիական համալսարանի անասնաբուժական բաժնից:
Իր ելույթում ԱՀ գյուղատնտեսության նախարարի տեղակալ Տիգրան Առստամյանը կարևորեց բրուցելյոզի հայտնաբերման գործընթացում շիճուկաբանների դերը: Նա նշեց, որ թեկուզ 2017 թվականի ընթացքում հանրապետությունում ուսումնասիրվել է խոշոր և մանր եղջերավոր անասունների արյան, համապատասխանաբար, 40 500 և 45 000 նմուշ, այնուամենայնիվ, դա բավարար արդյունք չէ, և անհրաժեշտ է ավելի հետևողական լինել, քանզի շիճուկաբանները, մեծ հաշվով, պատասխանատվություն են կրում մարդկանց առողջության համար:
– Դուք տեղերում մեր քաղաքականության իրականացնողներն եք: Ձեր գլխավոր խնդիրը պիտի լինի այն, որ հետազոտություններում ընդգրկվի ողջ անասնագլխաքանակը: Հետևաբար, պետք է լինել ավելի հետևողական ու նպատակասլաց. նաև պարտավոր եք տեղերում անհրաժեշտ բացատրական աշխատանք տանել անասնատերերի հետ,-նշեց Տ. Առստամյանը՝ հավելելով, որ տեսական և գործնական մասերից բաղկացած նման սեմինար- պարապմունքներ այսուհետ կկազմակերպվեն ավելի հաճախակի, նաև՝ շրջաններում՝ մասնագետների պրոֆեսիոնալ հմտությունների կատարելագործման և փորձի փոխանակման համար:
Այնուհետև «Բրուցելյոզը և նրա սոցիալ-տնտեսական» նշանակությունը թեմայով հանդես եկավ ՀԱՍՓԼ ՊՈԱԿ-ի տնօրեն Ֆլորա Իսկանդարյանը, ինչից հետո Լաբորատորիայի անասնաբույժ-շիճուկաբան Ռադմիլա Սարգսյանը ներկայացրեց «Ռոզ-բենգալյան» փորձի դրման տեխնիկան (բրուցելյոզի քննման ձևը):
Միջոցառման երկրորդ մասը նվիրված էր Լաբորատորիայի շիճուկաբանական բաժնի աշխատանքին, որտեղ շրջաններից ժամանած շիճուկաբաններին ներկայացվեցին արյան նմուշի քննության գործնական մեթոդները և ստուգվեցին նրանց մասնագիտական հմտությունները:
