Ջրախնայողական տեխնոլոգիաների ներդրման խթանման ուղղված միջոցառումների իրականացում
22/05/2018
Հիմք ընդունելով 2018 թվականի մայիսի 11-ի «Արցախի Հանրապետությունում բուսաբուծության համալիր զարգացման ծրագիրը հաստատելու մասին» թիվ 350-Ն որոշման պահանջները՝ ԱՀ գյուղատնտեսության նախարարության աշխատակազմի ջրային տնտեսության և ինժեներական մելիորացիայի բաժնի, ինչպես նաև ջրային համակարգերի օգտագործման և պահպանության պետական տեսչության մասնագետները 2018 թվականի մայիսի 14-ից Արցախի Հանրապետության շրջաններում իրականացնում են համապատասխան ուսումնասիրություններ, որոնք նպատակ ունեն տեղազննման միջոցով պարզել Ասկերանի, Մարտակերտի և Մարտունու շրջաններում ոռոգման կաթիլային համակարգերի տեղադրման համար դիմած հայտատուների հողատարածքների նպատակահարմարությունը և հողի ոռոգման հետ առնչվող գրունտի ֆիզիկական այլ հատկությունները: «Ջրախնայողական տեխնոլոգիաների ներդրման խթանման» միջոցառման շրջանակներում էլ իրականացվել է հայտատուների հողատարածքների չափագրում, հողատարածքներին մոտ ջրային պաշարների կամ արտեզյան ջրհորերի առկայության ուսումնասիրություն և հետազոտություն:
Ուսումնասիրության փուլում են նաև հայտ ներկայացրած քաղաքացիների միավոր տարածքներում գտնվող գյուղատնտեսական նշանակության հողատարածքների գույքային իրավունքների, մշակվող կուլտուրաների, նոր հիմնադրվող և բազմամյա տնկարկների, ոռոգման կաթիլային համակարգերի ներդրման նպատակահարմարության և նախագծանախահաշվային փաստաթղթերը մշակելու հետ կապված մի շարք այլ հարցեր:
