ԱՀ Էկոնոմիկայի և գյուղատնտեսության նախարար Արմեն Թովմասյանի հրամանով ստեղծված հանձնաժողովը՝ կազմված ԱՀ ԷԳՆ աշխատակազմի բուսաբուծության և բույսերի պաշտպանության վարչության, գյուղատնտեսական տեխնիկայի պետական տեսչության ու գյուղատնտեսական ծրագրերի մոնիթորինգի և վերլուծության բաժնի ներկայացուցիչներից և գլխավորությամբ հանձնաժողովի նախագահ Մարտին Ավանեսյանի, մարտ-ապրիլ ամիսներին հանրապետության թվով 33 համայնքներում ստուգումներ են իրականացրել՝ նվազագույնը 100 քառ. մետր ջեռուցվող և չջեռուցվող ջերմոցային տնտեսություններին, 1 քառ. մետրի դիմաց, համապատասխանաբար, 600 և 300 դրամ ֆինանսական աջակցության տրամադրման ծրագրի շրջանակում:

Այսպես, ստացվել էր, ընդհանուր առմամբ, 191 աջակցության հայտ՝ 57 711 քառակուսի մետր ջերմոցի համար:

Ստուգումների արդյունքում դրական եզրակացություն են ստացել թվով 166 շահառուներ (հայտեր)՝ 45 512 քառ. մետր ջերմոցի համար:

Դրական եզրակացություն ստացած հողօգտագործողների անվանացանկը ներկայացվել է ԱՀ գյուղի և գյուղատնտեսության աջակցության հիմնադրամ՝ ֆինասավորման գործընթացի մեկնարկի նպատակով: