Ուշադրություն, այգիները ցրտահարությունից պաշտպանելու համար ԱՀ գյուղատնտեսության նախարարության մասնագետները հորդորում են.
30/03/2023

Համաձայն ԱՀ ԱԻՊԾ «Հիդրոօդերևութաբանության և մոնիտորինգի պետական ծառայություն» ՊՈԱԿ տեղեկատվության` առաջիկա օրերին ԱՀ տարածքում հնարավոր է ջերմաստիճանի կտրուկ նվազում, գիշերվա ժամերին` բացասական ջերմաստիճանի գրանցմամբ:
Ներկայումս ԱՀ հարթավայրային շրջաններում ընթացքի մեջ են ծիրանենու, դեղձենու և շլորենու ծաղկումը, բողբոջել են կեռասենին և մի շարք այլ պտղատեսակներ:
Նշված ջերմաստիճանային ռեժիմի գրանցման  դեպքում կարող են վնասվել ծաղկած այգիները, մասամբ` նաև ծառերի բողբոջները:
Պտղատու այգիները ցրտահարության հնարավոր վտանգից պաշտպանելու համար խորհուրդ է տրվում դիմել ավանդական միջոցներին` այգիների հարակից ճանապարհների վրա քամու ուղղությամբ պատրաստել կիսաչոր բուսական մնացորդների, ծառի ճյուղերի,   աթարի և այլ այրվող նյութերի կույտեր, ինչպես նաև այգու տարբեր հատվածներում գոմաղբի եվ ծղոտի խառնուրդի կույտեր և գիշերվա ժամերին, երբ ջերմաստիճանը նվազելով մոտենում է 0 աստտիճանի` այրել (ծխեցնել) նշված կույտերը` ամբողջ այգին պատելով կայուն ծխածածկույթով: Սովորաբար, ամենացածր ջերմաստիճանները գրանցվում են առավոտյան ժամը 4-ից մինչև 7-ն ընկած ժամանակահատվածում:
Եթե կա ոռոգման հնարավորություն, ապա խորհուրդ է տրվում սպասվող ցրտահարության օրը պտղատու այգիները գիշերային ժամերին առատ ոռոգել:
Սինթետիկ թաղանթների տակ աճեցվող բանջարաբոստանային տարբեր մշակաբույսերը, սածիլները, ելակի, կարտոֆիլի բույսերը և այլն նույնպես կարող են վնասվել: Ուստի խորհուրդ է տրվում օգտագործել լրացուցիչ ծածկոցներ կամ հնարավորության դեպքում կատարել ջեռուցում` ապահովելով դրական ջերմաստիճանային պայմաններ: