Ապրիլի 6-ին ԱՀ գյուղատնտեսության նախարար Նորայր Մուսայելյանն այցելել է 44-օրյա պատերազմի հետևանքով բռնազավթված Շուշիից Ստեփանակերտ տեղափոխված Շուշիի տեխնոլոգիական համալսարան, տեղում ծանոթացել շենքային և ուսման գործընթացի կազմակերման պայմաններին:

ՇՏՀ ռեկտոր Նվեր Միքայելյանի, պրոֆեսորադասախոսական կազմի և ուսանողների հետ հանդիպման ժամանակ Նորայր Մուսայելյանը ընդգծել է, որ կրթօջախը իր համար հանդիսանում է հարազատ, քանի որ ժամանակին նա և՛ ուսանել, և՛ դասավանդել է այստեղ:

Նախարարը հանգամանորեն ներկայացրել է նախարարության կողմից իրականացվող ծրագրերը, դրանցից օգտվելու պայմանները և ուսանողներին կոչ է արել ամենայն լրջությամբ վերաբերել ուսմանը, ամբողջությամբ ներգրավվել այդ գործընթացի մեջ, որպեսզի ապագայում կարողանան լինել պահանջված և մրցունակ մասնագետներ և ի զորու լինեն դիմակայել արդի աշխարհի մարտահրավերներին՝ հատկապես պարենի համաշխարհային ճգնաժամի պայմաններում:

Հնչել են մի շարք հարցեր ու առաջարկներ ուսանողների և դասախոսների կողմից՝ ուղղված նախարարություն-համալսարան կապի սերտացմանն ու համագործակցության ընդլայնմանը:

Համալսարանում հանդիպումից հետո նախարարը ուսանողների, ռեկտորի և դասախոսների հետ այցելել է Շուշիի տեխնոլոգիական համալսարանի՝ Աջափնյակ թաղամասում գտնվող փորձահողամաս և բոլորի հետ մասնակցել պտղատու ծառերի տունկին:

Հանդիպումն անցել է կառուցողական և անկեղծ շփման մթնոլորտում: