|
Եղանակի տեսությունը  |
ՆԱԽԱՐԱՐ ԱՐԱՄ ՄԽՈՅԱՆԸ ՄԱՍՆԱԿՑԵՑ ՆԱԽԻՋԵՎԱՆԻԿ ԵՎ ՎԱՐԴԱՁՈՐ ՀԱՄԱՅՆՔՆԵՐԻ ՂԵԿԱՎԱՐՆԵՐԻ ՏԱՐԵԿԱՆ ՀԱՇՎԵՏՎՈՒԹՅՈՒՆՆԵՐԻՆ
10/02/2016 Նախիջևանիկում համայնքապետի հաշվետվությունից հետո ծայր առած քննարկումների արդյունքում հնչած հարցերի առանցքում էին գիշերային լուսավորության, սեփականաշնորհման վկայականների տրամադրման, ճանապարհների բարեկարգման, բերքատվության ցուցանիշների բարձրացման խնդիրները: Համայնքի բնակիչների ելույթներն էլ վերաբերում էին սև ցելին, տնկիների տրամադրմանը, անասունների պահվածքի և ոռոգման խնդիրների կարգավորմանը: Արամ Մխոյանը գյուղի ակտիվին ներկայացրեց գյուղոլորտում իրականացվող նոր քաղաքականությունը, ինչը ենթադրում է պետության ղեկավարության որդեգրած՝ դեմքով դեպի գյուղն ու գյուղացին քաղաքականության՝ հնարավորինս մանրակրկիտ արտածում. նախևառաջ գործի նկատմամբ առկա վերաբերմունքի վերանայում է պետք. անհրաժեշտ է որակական փոփոխություն. պետք է կիրառել նորագույն տեխնոլոգիաներ, ինչը հնարավորություն կտա բարձրացնել բերքատվությունն ու ընդհանուր ցուցանիշները: Աջակցություն հեռանկարային ծրագրերին, այդ թվում և նոր մշակաբույսերի ներդրում, ոչ ավանդական պտղատեսակներով այգիների հիմնում, ոռոգման համակարգի կարգավորում և կաթլիային ոռոգում, հողի ճիշտ սնուցման արմատավորում: Պետությունը նաև տնկիներ կտրամադրի, բայց և, զուգահեռաբար, կհիմնվեն տնկարանային տնտեսություններ, որոնք և կմատակարարեն անհրաժեշտ տնկիները: Հողօտագործողներին ցուցաբերվելիք աջակցությունը կամբողջանա տրամադրվելիք սերմերի ու պարարտանյութեր մի մասի անվճար լինելու իրողությամբ: Առանձին ներկայացվեց գարնանացան մշակաբույսերի աջակցության ծրագիրը. արևածաղիկ, սորգո, հնդկաձավար, բանջարեղեն ու բազմամյան խոտ (կորնգան) աճեցնողներին աջակցության կարգով կտրամադրվեն անհրաժեշտ սերմերն ու պարարտանյութեր: Խոսք հնչեց ոռոգման հետ կապված խնդիրների մասին: Փոխնախարար Գևորգ Վերանյանը պարզաբանեց, որ ոռոգման համակարգի արդյունավետ կառավարում իրականացնելու համար, ջրից օգտվելու գործող կարգի համաձայն, անհրաժեշտ է նախօրոք ներկայացնել հայտեր: Համայնքի ակտիվը համայնքապետ Անատոլի Սահակյանի գործունեությունը գնահատեց բավարար: Վարդաձորի համայնքի ղեկավար Սամվել Սառաջյանի գործունեությունը ևս գնահատվեց բավարար:
|
