Ավանդույթի համաձայն, դեկտեմբերի 30-ին Արցախի Հանրապետության գյուղատնտեսության նախարար Ժիրայր Միրզոյանն այցելեց առաջնագծի մի շարք դիրքեր: Պատվիրակության կազմում էին նաև ԱՀ մարդու իրավունքների պաշտպան Արտակ Բեգլարյանն ու ԳՆ սննդի անվտանգության պետական ծառայության պետ Արթուր Ներսիսյանը: Շնորհավորելով դիրքապահ մարտիկներին գալիք Ամանորի և Սուրբ ծննդյան տոների կապակցությամբ՝ նախարարը նրանց հանձնեց նվերներ: Ժիրայր Միրզոյանը նշեց, որ հայ ժողովուրդնառանձնահատուկ հպարտությամբ է լցված այսպիսի ուժեղ, հայրենանվեր և զգոն սահմանապահներ ունենալու առիթով: -Հենց ձեր կողմից հայրենիքի առջև սրբազան պարտքը անվերապահորեն կատարելու շնորհիվ է, որ մենք հնարավորություն ենք ստանում լծվելու հայրենիքի շենացման գործին, և ձեր ու ձեր գործի նկատմամբ ունեցած հավատն է գլխավոր գրավականը, որ մեր հայրենակիցների համար հանդիսանում է որպես անվտանգության գլխավոր երաշխիք,- նշեց Ժիրայր Միրզոյանը:
Այցի ընթացքում հյուրերը ծանոթացան դիրքապահ մարտիկների կենցաղային պայմաններին և վայելեցին նրանց հյուրասիրած սուրճը:
