|
Եղանակի տեսությունը  |
Հրանտ Սաֆարյանը հանդիպել է հանրապետության մի շարք ֆերմերների հետ
17/01/2023  Հունվարի 17-ին ԱՀ գյուղատնտեսության նախարար Հրանտ Սաֆարյանը հանդիպել է Արցախում անասնաբուծությամբ զբաղվող մի շարք ֆերմերների հետ, լսել նրանց հուզող խնդիրները և առաջարկությունները:Ակտիվ շփումների և քննարկումների արդյունքում ֆերմերները հնչեցրել են մի քանի տասնյակ հարցեր, կապված, մասնավորապես, ստեղծված իրավիճակում անասնակերի անբավարարության, արոտավայրերի սակավության պայմաններում ոլորտի զարգացման, անասնաշենքերի կառուցման ու բարեկարգման, անասնագլխաքանակի ավելացման հնարավորությունների, ինչպես նաև մթերված կաթի դիմաց տրամադրվող լրավճարի չափի վերանայման հետ:
Բարձրացված մի շարք հարցերին, ինչպիսիք են դիզվառելիքի որոշակի քանակության տրամադրում՝ անասուններին չջրաֆիկացված ֆերմաներում ջրով ապահովման համար (դիմումները՝ համայնք, վարչակազմ, նախարարություն շղթայով), անասնաբույժների ներկայության ապահովում հեռագնա արոտավայրերում, որոշ խոշոր ֆերմաներում կոյուղիների կառուցում և այլն, նախարարը հանձնարարել է լուծում տալ մոտ ապագայում:
«Բոլոր հնչեցված հարցերի շուրջ տեղի կունենա ընդլայնված քննարկում, կընդունվեն համապատասխան որոշումներ, որոնց մասին կտեղեկացվեք նաև դուք»,- եզրափակել է քննարկումը նախարարը:
Հանդիպմանը մասնակցել են նաև ԱՀ գյուղատնտեսության նախարարի առաջին տեղակալ Տիգրան Առստամյանը, ԳՆ աշխատակազմի անասնաբուծության և անասնաբուժության վարչության պետ Ռադիկ Գևորգյանը և այլ մասնագետներ:
|
