ՀՀ գյուղատնտեսության նախարարության պատվիրակությունն այցելել է Արցախի գործընկերներին
03/12/2018
Դեկտեմբերի 2-3-ին ճանաչողական այցով Արցախում էր գտնվում ՀՀ գյուղատնտեսության նախարար Գեղամ Գևորգյանի գլխավորած պատվիրակությունը:
Արցախցի իր գործընկերոջ ուղեկցությամբ հայաստանյան գյուղոլորտի ղեկավարը նախ եղավ «Տոհմային կայան» ՓԲԸ-ում, որտեղ ծանոթացավ տոհմային կենդանիների բուծմանն ու խնամքին: Գ. Գևորգյանը բարձր գնահատեց կայանի գործունեությունը՝ արցախյան անասնաբույծների փործը գնահատելով ուսանելի: Այնուհետ գյուղոլորտի պատասխանատուների պատվիրակությունը եղավ Հադրութի շրջանի Տող գյուղում գտնվող «Անուշ-1» ՍՊԸ («Կատարո» գինու գործարան), որը, ինչպես նշեց ՀՀ գյուղատնտեսության նախարարը, արդեն վաղուց առանձնանում է լայն ճանաչում ու պահանջարկ ունեցող արտադրանքով:
Արդեն դեկտեմբերի 3-ին հայկական երկու պետությունների գյուղոլորտների ղեկավարները հանդիպեցին Ժիրայր Միրզոյանի աշխատասենյակում, որի ժամանակ քննարկվեցին փոխադարձ հետաքրքրություն ներկայացնող մի շարք հարցեր: Ընդգծվեց,որ չնայած արդեն առկա է սերտ համագործակցության ցանկալի և գոհացուցիչ մակարդակ, անհրաժեշտ է համագործակցությունն էլ ավելի խորացնել, այդ թվում և մասնագիտական վերապատրաստումների տեսքով:
Ավելի լայն կազմով հանդիպմանը մասնակցեցին նաև ԱՀ ԳՆ ստորաբաժանումների ղեկավարները:
