Ցանքաշրջանառության խթանման ծրագրով նպատակ է դրվում պետական աջակցության շարունակական կիրառման ճանապարհով լուծելու տևականորեն չմշակված վարելահողերի շրջանառության մեջ ներգրավման, գյուղատնտեսական մշակաբույսերի ագրոտեխնիկական միջոցառումների բարելավման, ցանքատարածությունների և համախառն բերքի ավելացման, ինչպես նաև տնտեսական աճի ապահովման խնդիրները:

Ծրագրի իրականացմանն ուղղված միջոցառումներն են.

1) գարնանացան մշակաբույսերի սերմերի արժեքի սուբսիդավորում և լրավճարի տրամադրում,

2) բանջարաբոստանային մշակաբույսերի մշակությամբ զբաղվող անձանց անհատույց ֆինանսական միջոցների տրամադրում,

3) սիլոսի համար եգիպտացորենի և ծխախոտի մշակությունից ստացված բերքի իրացման դիմաց լրավճարի տրամադրում:

Հիմք ընդունելով ծրագրով սահմանված ժամկետները, տեղական ինքնակառավարման մարմինները (Ստեփանակերտ քաղաքում՝ Գյուղատնտեսության նախարարությունը) ընդունում են գարնանացան և բանջարաբոստանային մշակաբույսերի մշակություն իրականացրած հողօգտագործողների հայտերը: Հայտերի հետ միաժամանակ ներկայացվում են համայնքների վարչական սահմաններում գտնվող գյուղատնտեսական նշանակության տարածքների նկատմամբ սեփականության և (կամ) վարձակալության և (կամ) անհատույց օգտագործման իրավունքի պետական գրանցման վկայականների և անձնագրերի պատճենները:

Գարնանացան մշակաբույսերի սերմերի արժեքի սուբսիդավորում և լրավճարի տրամադրում.

Նվազագույնը 0,5 հեկտար (մեկ ամբողջական հողատարածքում) մակերեսով հողատարածքում գարնանացան մշակաբույսերից եգիպտացորենի, արևածաղկի, հնդկացորենի և կտավատի մշակությամբ զբաղվող հողօգտագործողներին տրամադրվում է՝ 1 հեկտարի դիմաց սահմանված համապատասխան քանակությամբ սերմ՝ սերմի արժեքի 80 տոկոսի չափով սուբսիդավորմամբ:

Կորնգանի և առվույտի մշակությամբ զբաղվող հողօգտագործողներին տրամադրվում է՝ 1 հեկտարի դիմաց սահմանված համապատասխան քանակությամբ սերմ՝ սերմի արժեքի 100 տոկոսի չափով սուբսիդավորմամբ (նախկին 80 տոկոսի փոխարեն), իսկ սեփական միջոցներով սերմերի ներմուծման դեպքում՝ սերմի արժեքի 80 տոկոսի չափով սուբսիդավորում:

Սեփական միջոցներով սերմերի ներմուծման դեպքում հայտատուները հայտին պարտադիր կցում են սերմացուի հավաստագրի, ներմուծումը հավաստող փաստաթղթի, որակի փորձաքննության անցկացման արդյունքների մասին համապատասխան փաստաթղթի պատճենները:

Հայտերն ընդունվում են մինչև սույն թվականի ապրիլի 1-ը:

Սույն միջոցառումից օգտվելու պարտադիր պայման է հանդիսանում. եգիպտացորեն, արևածաղիկ և առվույտ մշակաբույսերի դեպքում հողատարածքի՝ ոռոգման ջրով ապահովված լինելու կամ, ելնելով նշված տարածքում արձանագրված օդերևութաբանական ցուցանիշներից, գարնանացան մշակաբույսերի մշակության համար պահանջվող կլիմայական գոտուն՝ հողատարածքի համապատասխանության պայմանը:

Բանջարաբոստանային մշակաբույսերի մշակությամբ զբաղվող անձանց անհատույց ֆինանսական միջոցների տրամադրում.

Բանջարաբոստանային մշակաբույսեր մշակելու համար հողօգտագործողներին անհատույց տրամադրվում է 1 հեկտարի դիմաց՝ 200 000 դրամ միանվագ գումար (պարտադիր պայմաններ են հանդիսանում մեկ ամբողջական հողատարածքի մակերեսը ոչ պակաս, քան 0,5 հեկտար լինելը և ոռոգովի դաշտի առկայությունը (բացառությամբ՝ կարտոֆիլի):

Հայտերն ընդունվում են 2 փուլով՝ մինչև սույն թվականի մայիսի 1-ը և օգոստոսի 1-ը:

Սիլոսի համար եգիպտացորենի և ծխախոտի մշակությունից ստացված բերքի իրացման դիմաց լրավճարի տրամադրում.

Սիլոսի համար եգիպտացորենի մշակությունից ստացված բերքի իրացման դեպքում տրամադրվում է լրավճար՝ 1 կիլոգրամի դիմաց 10 ՀՀ դրամ գումարի չափով, իսկ ծխախոտից ստացված բերքի իրացման դեպքում՝ 1 կիլոգրամի դիմաց 20 ՀՀ դրամ գումարի չափով:

Եգիպտացորենի սիլոսի դեպքում՝ լրավճարը տրամադրվում է Արցախի Հանրապետության տարածքում գործող անասնապահական ընկերություններին իրացված բերքի դիմաց, իսկ ծխախոտի դեպքում՝ ծխախոտի հումք մթերող ընկերություններին իրացված բերքի դիմաց:

Մթերող ընկերությունները տեղեկություններ են ներկայացնում Նախարարություն սիլոսի համար եգիպտացորենի բերքի մթերման գործընթացն ավարտելուց հետո ոչ ուշ, քան մինչև յուրաքանչյուր տարվա հոկտեմբերի 1-ը, իսկ ծխախոտի դեպքում՝ ոչ ուշ, քան մինչև յուրաքանչյուր տարվա նոյեմբերի 30-ը: Համապատասխան ֆինանսական միջոցները ստանալուց հետո մթերող ընկերությունները հինգ աշխատանքային օրվա ընթացքում հողօգտագործողներին են վճարում սիլոսի համար եգիպտացորենի և ծխախոտի բերքի իրացման դիմաց սահմանված լրավճարը:

Լրացուցիչ տեղեկությունների համար զանգահարել 047 94 35 01 հեռախոսահամարով: