«Արցախի Հանրապետությունում ջերմատնային տնտեսությունների զարգացման ծրագրի» շրջանակում ԱՀ գյուղատնտեսության նախարարի ստեղծած հանձնաժողովը, գլխավորությամբ հանձնաժողովի նախագահ Արամ Բադալյանի, ավարտել է ջերմոցային տնտեսությունների ուսումնասիրման և չափագրման աշխատանքների առաջին փուլը՝ պետական աջակցության տրամադրման նպատակով:

Աշխատանքներն ընթանում են ծրագրից բխող երկու միջոցառումների շրջանակում՝ ԱՀ-ում գործող նվազագույնը 100 քմ ամբողջական տարածք մակերես ունեցող ջեռուցվող և չջեռուցվող ջերմատնային տնտեսությունների և Արցախում նոր կառուցված՝ ավանդական եղանակով մշակվող (նվազագույնը 100 քմ ամբողջական տարածքով) և ժամանակակից տեխնոլոգիաներով հագեցած (նվազագույնը 500 քմ ամբողջական տարածքով) ջերմատնային տնտեսությունների ուղղությամբ:

Ուսումնասիրման և չափագրման արդյունքում դրական եզրակացություն ստացած շահառուներին կտրամադրվի ֆինանսական աջակցություն:

Հիշեցնենք, որ ջեռուցվող ջերմատնային տնտեսությամբ զբաղվողներին 1 հեկտարի դիմաց նախատեսվում է տրամադրել 6 000 000 դրամ (1 քառակուսի մետրի դիմաց՝ 600 դրամ), իսկ չջեռուցվող ջերմատնային տնտեսությամբ զբաղվողներին՝ 1 հեկտարի դիմաց 3 000 000 դրամ (1 քառակուսի մետրի դիմաց՝ 300 դրամ) անհատույց ֆինանսական աջակցություն:

Առանց ժամանակակից տեխնոլոգիաների կիրառման ջերմատնային տնտեսության կառուցման դեպքում 1 քառակուսի մետրի դիմաց կտրամադրվի 8 000 դրամ աջակցության, իսկ ժամանակակից տեխնոլոգիաներով հագեցված ջերմատնային տնտեսության կառուցման դեպքում` 1 քառակուսի մետրի դիմաց 22 000 դրամ աջակցության:

Սույն միջոցառման վերաբերյալ դիմումները կընդունվեն մինչև ընթացիկ տարվա նոյեմբերի 1-ը: