Հանդիպում Ավետարանոցում
20/02/2019
Փետրվարի 19-ին ԱՀ գյուղատնտեսության նախարար Ժիրայր Միրզոյանն այցելել է Ասկերանի շրջանի Ավետարանոց համայնք, որտեղ կայացել է հանդիպում Ասկերանի շրջանի վերին ենթաշրջանի համայնքների հողագործների և անասնապահների հետ: Հանդիպմանը մասնակցում էին նաև ԱՀ ԱԺ պատգամավոր Ռոբերտ Ղահրամանյանը, նախարարի տեղակալներ Տիգրան Առստամյանը, Վիլեն Ավետիսյանն ու Համլետ Ապրեսյանը, ԱՀ ԳԳԱՀ տնօրեն Տիգրան Ծատրյանը, ինչպես նաև նախարարի օգնական Արման Ղարամյանը:
Ժիրայր Միրզոյանը հավաքվածներին ներկայացրեց գյուղոլորտի զարգացման ուղղությամբ իրականացվող ծրագրերի ու աշխատանքների իրականացման ընթացքի մասին: Առանձին անդրադարձ եղավ գարնանացան մշակաբույսերի սերմերի տրամադրմանը. գործընթացը կսկսվի առաջիկա օրերին:
Գյուղոլորտում, ընդգծեց նախարարը, իրականացվում են այնպիսի նպատակային ծրագրեր, որոնք կոչված են գյուղատնտեսության արտադրողականությունը արդյունաբերական և որակական բարձր ցուցանիշների հասցնելուն, ինչ համար ոլորտի ծրագրերի մեծ մասը միտված են գյուղատնտեսությանն անհրաժեշտ ենթակառուցվածքներով, ժամանակակից տեխնոլոգիաներով համալրելուն:
Մանրակրկիտ ներկայացվեցին անասնաբուծության, այգեգործության, բանջարաբուծության, դաշտավարության և ոռոգման ոլորտներում առկա բոլոր ծրագրերը, և ներկաների ուշադրությունը հրավիրվեց ծրագրերի իրականացման արդյունավետությունը բարձրացնելու անհրաժեշտության վրա:
Նախարարը կարևորեց տեղական իշխանությունների հետ գերատեսչության սերտ կապը, այդ թվում և սննդի անվտանգությունն ապահովելիս, ինչպես նաև տեղերից տրամադրվող տեղեկատվության հստակությունն ու ճշգրտությունը:
Հանդիպման ավարտին նախարարն ու նրան ուղեկցող պաշտոնյաները պատասխանեցին հնչած՝ շուրջ երեք տասնյակ հարցերին:
Օրվա վերջում գյուղոլորտի ղեկավարներն իրականացրին Ջրաղացներ համայնքի տարածքում խորքային հորի կառուցման աշխատանքների դիտարկում:
-
-
