Հայտնի են բնական աղետներից տուժած ցանքատարածությունների և հասցված վնասների նախնական չափերը
22/06/2018
ԱՀ գյուղատնտեսության նախարար Ժիրայր Միրզոյանի հանձնարարականով ստեղծված աշխատանքային խմբերը հունիսի 19-ին և 20-ին՝ ի դեմս փոխնահարար Վիլեն Ավետիսյանի, գյուղատնտեսության նախարարի խորհրդական Միքայել Սողոմոնյանի, ԱՀ ԳՆ աշխատակազմի բուսաբուծության ու բույսերի պաշտպանության բաժնի պետ Արամ Բադալյանի, նախարարության և ԲՊԾ այլ մասնագետների եղել են հանրապետության տարբեր շրջանների՝ կարկուտից, ուժեղ քամուց, սելավներից տուժած ցանքատարածություններում, որտեղ ուսումնասիրել և ճշտել են բնական աղետների՝ գյուղատնտեսությանը հասցրած վնասների չափերն ու աստիճանը:
Այսպես, նախնական տվյալներով, հանրապետությունում աղետների հասցրած վնասի չափը հատում է 9450 հեկտարի սահմանագիծը: Հատկապես տուժել են Քաշաթաղի, Հադրութի, Ասկերանի, Մարտունու շրջանների ցանքատարածությունները (գարնանացան և աշնանացան մշակաբույսեր, բազմամյա տնկարկներ), որտեղ լրիվությամբ ոչնչացվել են, համապատասխանաբար, 5900, 2179, 1039, 350 հա ցանքեր:
Նշված տվյալները ենթակա են հետագա հստակեցման՝ նախատեսվող աջակցության միջոցներն առավել ճշգրիտ ու արդարացի սահմանելու նպատակով:
