ՀԱՅՏԱՐԱՐՈՒԹՅՈՒՆ
31/07/2020
Բերքահավաքի ժամանակահատվածի հետ կապված, Արցախի Հանրապետության գյուղատնտեսության նախարարությունը հիշեցնում է, որ համաձայն «Մթնոլորտային օդի պահպանության մասին» ԱՀ օրենքի 20-րդ հոդվածի, արգելվում է այրել խոզանները՝ բուսական մնացորդներով ու չորացած բուսականությամբ տարածքները, ինչպես նաև՝ արոտավայրերի ու խոտհարքների բուսականությունը՝ գյուղատնտեսական, անտառամերձ, անտառային ու բնության հատուկ պահպանվող տարածքների հողերում:
Բացի շրջակա միջավայրի և մարդու առողջության վրա վնասակար ազդեցությունից, խոզանի այրումը խիստ բացասական հետևանքներ թողնում նաև գյուղոլորտի վրա: Հողի վերին շերտի վրա պարբերաբար բարձր ջերմաստիճանի ազդեցության հետևանքով ոչնչանում են հումուսի պաշարը և հողում կենսագործող կենդանի օրգանիզմները, փոխվում են հողի ֆիզիկաքիմիական հատկություններն ու մեխանիկական կազմը, ինչի հետևանքով հողն առավել հեշտ է ենթարկվում քամու և ջրի էռոզիային: Խոզանի այրման ժամանակ այրվում են նաև բույսի աճի և զարգացման համար անհրաժեշտ սննդատարրերը:
Բերքահավաքից հետո բուսական մնացորդների (խոզանի) այրման բացասական հետևանքներից խուսափելու նպատակով՝ գյուղատնտեսության նախարարությունը կոչ է անում խոզանը այրելու փոխարեն դաշտը զբաղեցնող մշակաբույսի բերքահավաքից անմիջապես հետո կատարել խոզանի երեսվար կամ սկավառակային փոցխում, ինչը կարևոր նշանակություն ունի հաջորդ մշակաբույսերի բերքատվության համար:
