|
|
«ՀԱՄԱՅՆՔՆԵՐՈՒՄ ԱՆԱՍՆԱՊԱՀՈՒԹՅԱՆ ԿԱՆՈՆԱԿԱՐԳՄԱՆ ԵՎ ԿԱԶՄԱԿԵՐՊՄԱՆ ՀԵՌԱՆԿԱՐՆԵՐԸ» ԹԵՄԱՅՈՎ ԽՈՐՀՐԴԱԿՑՈՒԹՅՈՒՆ ՄԱՐՏՈՒՆՈՒ ՇՐՋՎԱՐՉԱԿԱԶՄՈՒՄ
15/11/2017
-
 Նոյեմբերի 15-ին Արցախի Հանրապետության գյուղատնտեսության նախարար Ժ. Միրզոյանը և նախարարի տեղակալ Տ. Առստամյանն այցելել են Մարտունու շրջանի վարչակազմ և տեղում հանդիպել շրջանի համայնքների ղեկավարների, անասնաբույժների ու գյուղատնտեսների հետ՝ քննարկելու անասնաբուծության ոլորտի զարգացման հեռանկարներն ու արոտների կառավարման խնդիրները:
Հանդիպման ընթացքում Նախարարը ներկաների ուշադրությանն է ներկայացրել անասնաբուծության ոլորտում առաջիկայում սպասվող արմատական բարեփոխումների ծրագիրն ու վերջինիս կյանքի կոչման ուղիները: Ժ. Միրզոյանը, մասնավորապես, ներկաներին ծանոթացրել է ԳՆ կողմից մշակվող «Անասնաբուծության կանոնակարգում և արոտավայրերի կառավարում» ծրագրին, որը ենթադրում է անասունների հաշվառման առավելագույն ճշգրտում, գյուղատնտեսական կենդանիների բարձիթողի պահվածքի բացառում, արոտավայրերի արդյունավետ կառավարում, արոտների ջրարբիացում, հերթափոխ արածեցման կամ արոտաշրջանառության կիրառում:
 Ըստ մշակվող ծրագրի, նախարարությունը կաջակցի կերակուտակման, արոտների ջրարբիացման, ինչպես նաև դեպի արոտներ տանող ճանապարհների բարեկարգման աշխատանքների կազմակերպմանը: Գյուղատնտեսության նախարարության կողմից կսահմանվեն անասնապահությամբ զբաղվելու համար հստակ պահանջներ, որոնց իրականացումը խիստ կվերահսկվի, իսկ անտեսումը կհանգեցնի համապատասխան վարչական տույժերի կիրառման:
 Նախարարն առաջարկել է վերանայել համայնքներում վարչական հանձնաժողովների կազմն ու գործունեության կարգը և պատրաստակամ լինել միասնական ուժերով իրականացնել սույն ծրագիրը, որը կոչված է ապահովել ոլորտի կանոնակարգում, անասնագլխաքանակի ավելացում, անասնաբուծության համախառն արտադրանքի շոշափելի աճ:
Հանդիպման ավարտից հետո Ժ. Միրզոյանն այցելել է «Մարտունու անասնաբուժական սպասարկման կայան» ՊՈԱԿ և տեղում ծանոթացել ընկերության գործառույթներին, աշխատանքային պայմաններին ու տեխնիկական հագեցվածությանը:
|
|
