Համագործակցությունը կխորանա
11/10/2019
Հոկտեմբերի 11-ին ԱՀ գյուղատնտեսության նախարար Ժիրայր Միրզոյանն ընդունել է Հայաստանի ազգային ագրարային համալսարանի ռեկտոր, նախագահ Վարդան Ուռուտյանին և բուհի ուսումնական աշխատանքների գծով պրոռեկտոր Ռոբերտ Մակարյանին:
Ժիրայր Միրզոյանը շնորհակալություն է հայտնել Արցախում կազմակերպված գիտագործնական կոնֆերանսներին բուհի պրոֆեսորադասախոսական կազմի ակտիվ մասնակցության համար և հույս հայտնել, որ համագործակցությունն ավելի կխորանա:
Տարին Արցախի գյուղոլորտի համար նաև ուսումնական էր, նշել է նախարարն ու հավելել, որ այս մոտեցումը շարունակական կլինի: Ժամանակը նոր հրամայականներ է թելադրում, և նոր մարտահրավերներին դիմակայելու, շոշափելի արդյունքներ գրանցելու համար անհրաժեշտ է բարձրացնել ոլորտում ներգրավված մասնագետների պատրաստականության մակարդակը: Արցախի գյուղոլորտում առկա է վերապատրաստման և ուսուցման խնդիր, և նախարարությունն այդ նպատակով պարբերաբար կազմակերպում է դասընթացներ և սեմինարներ, որոնցում ներգրավված են մասնագետներ ՀՀ-ից:
Շոշափվեցին նաև հարցեր՝ կապված վերապատրաստման նորագույն մեթոդների ու մոտեցումների, ինչպես նաև՝ տեխնիկական վերազինման անհրաժեշտության մասին:
Հանդիպմանը մասնակցում էր նաև ԱՀ ԳԳԱՀ տնօրեն Տիգրան Ծատրյանը:
