«Գյումրիի սելեկցիոն կայան»-ի կողմից կազմակերպվել է բարձր բերքատու սերմերի շնորհանդես
25/10/2019
Արցախի Հանրապետության գյուղատնտեսության նախարարությունը շարունակում է տեղեկատվական-խորհրդատվական բնույթի միջոցառումներ իրականացնել հանրապետության շրջաններում՝ կիրառելով տնտեսավարողների հետ տեղերում առարկայական հաղորդակցություն ունենալու սկզբունքը: Այսօր հերթական միջոցառումը տեղի ունեցավ Քաշաթաղի շրջանի վարչակազմում: ՀՀ էկոնոմիկայի նախարարության հետ համագործակցության շրջանակներում կայացել է «Գյումրիի սելեկցիոն կայան»-ի կողմից կազմակերպված հացահատիկային և հատիկաընդեղեն մշակաբույսերի սերմերի շնորհանդեսը, որին մասնակցում էին շրջանի համայնքների ղեկավարներ և հողօգտագործողներ:
Բացման խոսքում ԱՀ գյուղատնտեսության նախարարի տեղակալ Վիլեն Ավետիսյանը նշել է նման հանդիպումների կարևորության մասին և հույս հայտնել, որ համագործակցությունը կխորանա, կդառնա շարունակական և առաջիկայում երևան կգան այդ համագործակցության դրական արդյունքները:
Կայանի գործերի համակարգող Դավիթ Մարտիրոսյանն ու փոխտնօրեն, գյուղատնտեսական գիտությունների թեկնածու Վասպուրական Մելիքյանը, ի թիվս խորհրդատվական բնույթի այլ տեղեկատվության, ներկայացրել են իրենց կողմից արտադրված, բարձր բերքատվություն ապահովող սերմերի լայն տեսականին:
Հանդիպման վերջում բանախոսները պատասխանել են առաջադրված շուրջ երեք տասնյակ հարցերին:
Ինչպես նշել է Դավիթ Մարտիրոսյանը, համագործակցությունը կլինի շարունակական: Բարձրորակ սերմերից զատ, արցախցի հողօգտագործողներին կտրամադրվի նաև անհրաժեշտ խորհրդատվություն:
-
-
