Գյուղտեխնիկայի խնդիրը ԱՀ կառավարության ուշադրության կենտրոնում է
21/06/2019
Հանրապետությունում գյուղտեխնիկայի պարկի վերազինման գործընթացը կյանքի կոչելու համար համապատասխան քայլեր են արվում։ «Կոնվերս Բանկ» ՓԲ ընկերության, ԱՀ Գյուղի և գյուղատնտեսության աջակցության հիմնադրամի և ԱՀ ԳՆ գյուղատնտեսական տեխնիկայի պետական տեսչության համագործակցության շրջանակներում բանկն իր գործող և պոտենցիալ հաճախորդներին առաջարկում է գյուղտեխնիկայի լիզինգ՝ մինչև 6 տարի ժամկետով և 13% տարեկան դրույքաչափով: Տոկոսագումարը սուբսիդավորվելու է Գյուղի և գյուղատնտեսության աջակցության հիմնադրամի կողմից: Ի տարբերություն անհատական նախաձեռնությամբ ձեռք բերվող գյուղտեխնիկայի, պետության միջամտությամբ այն ձեռք բերելն ակնհայտ մատչելի պայմաններ կունենա։ Հանրապետություն նոր գյուղտեխնիկա ներկրելու նպատակով գյուղատնտեսության նախարարության ներկայացուցիչնեը բանակցություններ են վարում բանկերի և մատակարարների, ինչպես նաև՝ ռուսական ընկերությունների հետ։ ԱՀ շրջվարչակազմերի կողմից ԳՆ գյուղատնտեսական տեխնիկայի պետական տեսչությանն են տրամադրվել բոլոր վճարունակ սուբյեկտների հայտերը, համակարգվել են բոլոր պահանջները: Լիզինգը տրամադրելիս գյուղատնտեսական տեխնիկայի գնահատում չի իրականացվում: Որպես գնահատված արժեք, հիմք է ընդունվում վաճառողի կողմից հաճախորդին տրված փաստաթղթում (տեղեկանքում) նշված արժեքը: Լիզինգավճարների ժամանակացույցը սահմանված է եռամսյակային կտրվածքով, իսկ ապահովագրությունն իրականացնում է բանկը: Գյուղտեխնիկան ներկրվում է անմիջապես արտադրողից, տրամադրվում է 1 տարի երաշխիքով, իրականացվում է ետերաշխիքային սպասարկում, պահեստամասերով ապահովում և տրակտորների տեխնիկական սպասարկման ծառայություններ ցանկացած վայրում: Հանձնման-ընդունման ժամանակ մատակարարի կողմից տարվում է գյուղտեխնիկայի շահագործման և սպասարկման վերաբերյալ ծանուցում: Հանրապետություն 2019 թվականին արդեն մուտք են գործել 2 միավոր «Բելառուս 892» և 14 միավոր «Բելառուս 82.1» անիվավոր տրակտորներ: Առաջիկայում նախատեսվում է Արցախ ներկրել գյուղատնտեսական տեխնիկայի նոր խմբաքանակ։
