Արցախցի գործընկերոջ հրավերով Ստեփանակերտ է ժամանել ՀՀ գյուղատնտեսության նախարար Արթուր Խաչատրյանը
06/07/2018
Հուլիսի 6-ին Արցախի Հանրապետության գյուղատնտեսության նախարարությունում տեղի ունեցավ արցախցի գործընկերոջ հրավերով Ստեփանակերտ ժամանած՝ Հայաստանի Հանրապետության գյուղատնտեսության նախարար Արթուր Խաչատրյանի և փոխնախարար Ռոբերտ Մակարյանի հանդիպումը Արցախի Հանրապետության գյուղատնտեսության նախարար Ժիրայր Միրզոյանի հետ, որի ընթացքում քննարկվեց գյուղոլորտին վերաբերող հարցերի լայն շրջանակ:
Հայկական երկու պետությունների գյուղոլորտների ղեկավարները ներկայացրեցին գյուղատնտեսության ոլորտում առկա վիճակի, զարգացման միտումների և հեռանկարների վերաբերյալ իրենց տեսակետները: Ժիրայր Միրզոյանը նշեց, որ Արցախում ընդունվել է գյուղատնտեսության զարգացման նոր ռազմավարությունը, և նախանշվել են ոլորտի զարգացման ծրագրերն ու ուղղությունները: Արդեն մեկնարկել են նրանից բխող միջոցառումները:
Ցանքաշրջանառությունը դաշտավարության մեջ կդառնա պարտադիր պայման, ինչը նպատակ ունի նաև բարելավել հողերի բերրիությունը: Նախարարությունը ամեն կերպ կօժանդակի և կխրախուսի օրգանական պարարտանյութերի կիրառումը: Բույսերի պաշտպանության ոլորտում հետամուտ են իրականացվող համալիր միջոցառումների կատարելագործմանը. անհրաժեշտ է հակակարկտային հուսալի համակարգի ստեղծում: Խոսելով Արցախում այգեգործության զարգացման մասին՝ Ժ. Միրզոյանը նշեց, որ այս ոլորտում պետությունը գործուն օժանդակություն է ցուցաբերում ոռոգման կաթիլային համակարգ ներդնել ցանկացողներին:
Ընթացքի մեջ է «Անասնաբուծության կանոնակարգում և արոտավայրերի կառավարում» ծրագիրը, շուտով կսկսվի գյուղատնտեսական կենդանիների հաշվառման ու համարակալման գործընթացը: Խնդիրներ կան անասնաբուծության և անասնաբուժության ոլորտներում՝ և՛ հիվանդությունների դեմ պայքարի, և՛ մասնագետների վերապատրաստման ուղղությամբ: Հանրապետությունում անասնագլխաքանակի որակական հատկանիշների բարելավմանն է միտված «Տոհմային կայան»-ի գործունեությունը. կայանն անասնապահներին է տրամադրում տոհմային հորթեր: Այս նպատակի համար իրականացվում է նաև արհեստական սերմնավորում:
Շնորհակալություն հայտնելով իր գործընկերոջը հրավերքի համար՝ Ա. Խաչատրյանն անդրադարձավ հայաստանյան գյուղոլորտին՝ նշելով, որ երկու գերատեսչությունների միջև սերտ համագործակցությունն այլընտրանք չունի: Առկա խնդիրները, ընդգծեց ՀՀ գյուղնախարարը, հիմնականում նույնն են, և իրենց համար ևս արցախցի գործընկերների փորձն ուսանելի կլիներ: Ա. Խաչատրյանը պատրաստակամություն հայտնեց համակողմանի աջակցություն ցուցաբերել Արցախում իրականացվող գյուղատնտեսական ծրագրերին: Երկու նախարարները համակարծիք էին, որ օրգանական գյուղատնտեսությունը մեր գյուղոլորտների համար ցանկալի հեռանկար է:
Օրվա երկրորդ կեսին Արթուր Խաչատրյանը, Ռոբերտ Մակարյանն ու Ժիրայր Միրզոյանը պաշտոնատար այլ անձանց հետ այցելեցին «Արցախկաթ» ՓԲԸ, «Տոհմային կայան» ՓԲԸ և «Ռեյփսիդ» ՍՊԸ (ձեթի գործարան):
