ԱՐՑԱԽՈՒՄ ՄԵԾ ՇՈՒՔՈՎ ՆՇՎԵՑ ԲԵՐՔԻ ՏՈՆԸ
12/10/2015
Հոկտեմբերի 11-ի առավոտից Ստեփանակերտի Վերածննդի հրապարակում թևածում էր տոնական տրամադրությունը. ԼՂՀ գյուղատնտեսության նախարարության նախաձեռնությամբ հերթական անգամ կազմակերպվել էր «Բերքի տոն» ամենամյա միջոցառումը: Տոնավաճառն ու նրանում ներկայացված բերքն ու բարիքն օրհնել է ՀԱԵ Արցախի թեմի առաջնորդ Պարգև արքեպիսկոպոս Մարտիրոսյանը, ինչից հետո Արցախի գյուղատնտեսության նախարար Արամ Մխոյանի ուղեկցությամբ նախագահ Բակո Սահակյանի գլխավորած պաշտոնական պատվիրակությունը շրջել է տոնավաճառի տաղավարներով, ծանոթացել ներկայացված գյուղմթերքներին և արտադրատեսակներին։
Արցախի գյուղատնտեսական մթերքների և արտադրատեսակների նմուշների ցուցահանդես-տոնավաճառը, որը հանդիսանում է գյուղմթերքների արտադրության տարվա գլխավոր ստուգատեսը, իր բոլոր նախորդներից տարբերվեց առավելագույնս ներկայացվածությամբ՝ թե տեսականու և թե մասնակցության առումով. ավելի քան 500 մեքենաներով իրենց արտադրությունն էին ներկայացրել հանրապետության շուրջ 200 համայնքների տնտեսվարողները: Գյուղնախարարության կողմից ֆինանսավորվել են տրանսպորտային բոլոր ծախսերը, և պայմանավորվածություն է ձեռքբերվել, որպեսզի տնտեսվարողները մթերքները վաճառեն շուկայականից ցածր գներով։ Միջոցառումն ուղեկցվում էր ԼՂՀ շրջաններից ժամանած մշակութային կոլեկտիվների ներկայացրած գեղարվեստական ծրագրերով:
