Արցախի գյուղնախարարը հյուրընկալել է ՀՀ էկոնոմիկայի նախարարության պատվիրակությանը
24/07/2020
Հուլիսի 24-ին Հայաստանի Հանրապետության էկոնոմիկայի նախարարության պատվիրակությունը, գլխավորությամբ նախարար Տիգրան Խաչատրյանի, հյուրընկալվել է Արցախի Հանրապետության գյուղատնտեսության նախարարությունում՝ նախարար Աշոտ Բախշիյանի հրավերով:
Օրակարգում երկու հայկական պետությունների հարակից գերատեսչությունների միջև համագործակցության զարգացման և ամրապնդման հարցն էր:
Ողջունելով Տիգրան Խաչատրյանին, Արցախի գյուղնախարարն ընդգծել է հարակից գերատեսչությունների միջև աշխատանքային հարաբերությունների նոր՝ առավել բարձր մակարդակի ձևավորման կարևորությունն ու անհրաժեշտությունը՝ հաշվի առնելով ոլորտի առջև ծառացած խնդիրներն ու ժամանակի մարտահրավերները, հատկապես՝ պարենային անվտանգության բնագավառում: Տիգրան Խաչատրյանն իր հերթին նշել է հնարավորության սահմաններում արցախյան գործընկերներին տարբեր հարցերում օժանդակելու՝ իր ղեկավարած կառույցի պատրաստակամությունը:
Այնուհետև երկու նախարարները հանդիպել են ընդլայնված կազմով՝ ի դեմս պատվիրակության մյուս անդամների և ԱՀ գյուղնախարարության պաշտոնատար անձանց և քննարկել համատեղ ջանքեր գործադրելու երկկողմ օրակարգն առավել խորացնելուն և զարգացնելուն միտված հարցեր:
Երկուստեք կարևորելով գերատեսչությունների միջև գործնական հարաբերությունների սերտացումը, կողմերը ստորագրել են համագործակցության հուշագիր, որի հիմնական նպատակը կայանում է տեխնիկական ու գիտական համագործակցության մշակման ու իրականացման և գյուղատնտեսության բնագավառում նախագծերի և ծրագրերի իրագործման մեջ:
Օրվա երկրորդ կեսին նախարարներն, ուղեկցությամբ իրենց տեղակալների, այցելել են Մարտունու շրջանի Կարմիր Շուկա համայնքում գտնվող «Ռեյփսիդ» ձեթի գործարան, որտեղ ծանոթացել են վերջինիս տեխնիկական հագեցվածությանն ու արտադրական հզորություններին:
Պատվիրակությանը հյուրընկալել է նաև Արցախի նախագահ Արայիկ Հարությունյանը:
