Ավարտվել են բանջարեղենի ցանքսերի ստուգման առաջին փուլի աշխատանքները
22/07/2019
Բուսաբուծության ոլորտի զարգացմանն ուղղված ԱՀ գյուղատնտեսության նախարարության կողմից իրականացվող կարևորագույն ծրագրերից մեկի՝ «Արցախի Հանրապետությունում բուսաբուծության համալիր զարգացման ծրագրի» շրջանակում ընթացիկ տարվա մայիսի վերջին մեկնարկած բանջարեղենի ցանքսերի ստուգման և չափագրման աշխատանքների առաջին փուլն ավարտված է: Աշխատանքներն իրականացրել են ԱՀ գյուղատնտեսության նախարարության աշխատակազմի բուսաբուծության և բույսերի պաշտպանության վարչության ու գյուղատնտեսական ծրագրերի մոնիթորինգի և վերլուծության բաժնի ներկայացուցիչները:
Ինչպես գիտենք, վերոնշյալ ծրագրով նախատեսված է շոշափելի աջակցություն. յուրաքնչյուր 1 հեկտար բանջարեղենի մշակության դիմաց անհատույց հողօգտագործողներին է տրամադրվում 200 հազ. ՀՀ դրամի չափով գումար, պոմիդորի մշակության դիմաց՝ 250 հազ. ՀՀ դրամի չափով աջակցություն կամ այդ գումարներին համարժեք քանակությամբ ապրանքանյութեր, և կարտոֆիլի մշակութան համար՝ 1 հեկտարի դիմաց 150 հազ. ՀՀ դրամի չափով գումար:
Ծրագրից օգտվելու համար հայտեր են ստացվել հանրապետության Ասկերանի, Հադրութի, Մարտակերտի, Մարտունու, Քաշաթաղի շրջաններից: Ընդհանուր առմամբ, ծրագրում ընգրկվել է 110 հողօգտագործող հանրապետության 41 համայնքներից: Աջակցության ենթակա ցանքատարածքների թիվը կազմել է 178.6 հա, այդ թվում՝ խառը բանջարեղեն՝ 118.4 հա, պոմիդոր՝ 9 հա, կարտոֆիլ՝ 51.2 հա:
Բոլոր դրական եզրակացություն ստացած հողօգտագործողները կարող են դիմել ԱՀ ԳԳԱՀ՝ աջակցությունը ստանալու նպատակով:
Առաջիկայում կմեկնարկի ստուգումների երկրորդ փուլը:
-
-
