Աշոտ Բախշիյանն ընդունել է ՀՀ սննդամթերքի անվտանգության տեսչական մարմնի ղեկավարին
13/08/2020
Օգոստոսի 13-ին ԱՀ գյուղատնտեսության նախարար Աշոտ Բախշիյանը հյուրընկալել է Հայաստանի Հանրապետության սննդամթերքի անվտանգության տեսչական մարմնի ղեկավար Գեորգի Ավետիսյանին:
Սննդամթերքի անվտանգության մակարդակի բարձրացումն ինչպես ՀՀ-ում, այնպես էլ Արցախի Հանրապետությունում կարևոր ռազմավարական խնդիր է: Հաշվի առնելով ժամանակակից աշխարհի մարտահրավերները, սննդամթերքի անվտանգության համակարգի հետևողական կատարելագործմամբ է պայմանավորված մեր ազգաբնակչությանն անվտանգ և որակյալ սննդամթերքով ապահովումը, միաժամանակ պահպանելով քանակ-որակ հարաբերակցության համաչափությունը:
-
-
Ողջունելով հյուրերին, Աշոտ Բախշիյանը կարևորել է երկկողմ համագործակցության մակարդակի բարձրացումն ու սերտացումը, ինչով, ըստ նախարարի, կկարողանանք դիմակայել սննդամթերքի անվտանգության ոլորտի առջև ծառացած ներկայիս մարտահրավերնրին:
Աշոտ Բախշիյանը լիակատար պատրաստակամություն է հայտնել համատեղ աշխատանքի կազմակերպման առավել բարձր մակարդակի հաստատման՝ Արցախում արտադրված գյուղմթերքի՝ սննդամթերքի անվտանգության համաշխարհային չափորոշիչներին համապատասխանեցնելու ուղղությամբ, ինչը կնպաստի գյուղատնտեսության մրցունակության բարձրացմանն արտահանման ոլորտում: Քննարկվել են նաև գյուղատնտեսական կենդանիների համարակալման ծրագրի համատեղ իրականացման հեռանկարները:
-
-
Շնորհակալություն հայտնելով ընդունելության համար, Գեորգի Ավետիսյանն ասաց, որ համագործակցությունը նախատեսվում է ոլորտի բոլոր ուղղություններով. նա կարևորեց միջազգային պրակտիկայում կիրառվող մի շարք սկզբունքների, մասնավորապես՝ սննդամթերքի արտադրության շղթայի դիտարկումը որպես մեկ միասնական ամբողջություն («դաշտից մինչև սեղան», «ֆերմայից մինչև պատառաքաղ» սկզբունքները):
Հանդիպմանը մասնկցել է նաև ԱՀ ԳՆ սննդամթերքի անվտանգության ծառայության պետ Արթուր Ներսիսյանը, ով առավոտյան գյուղատնտեսության նախարարի տեղակալ Տիգրան Առստամյանի հետ համատեղ Գ. Ավետիսյանին ծանոթացրել էր ԱՀ ԳՆ ՍԱՊԾ «Հանրապետական անասնաբուժական և սննդամթերքի փորձաքննությունների լաբորոտորիա» ՊՈԱԿ-ի առկա ներուժին ու խնդիրներին և պայմանավորվածություն ձեռք բերել մեր մասնագետների՝ ՀՀ-ում վերապատրաստվելու ուղղությամբ:
