Աշխատանքային խորհրդակցություն Մարտակերտի շրջանի վարչակազմում 31/01/2020
Հունվարի 30-ին ԱՀ գյուղատնտեսության նախարար Ժիրայր Միրզոյանը, ուղեկցությամբ նախարարի տեղակալներ Տիգրան Առստամյանի և Համլետ Ապրեսյանի, այցելել է Մարտակերտ, որտեղ շրջանի ղեկավարության հետ անցկացրել է աշխատանքային խորհրդակցություն: Օրակարգում մեկնարկած տարում Մարտակերտի շրջանում իրականացվելիք գյուղատնտեսական աշխատանքներն էին: Նախարարը ներկաների ուշադրությունը հրավիրեց գարնանացանը հավուր պատշաճի կազմակերպելու անհրաժեշտության վրա: Քննարկվեց մշակվելիք մշակաբույսերի ցանկը: Այս տարի շրջանում էլ ավելի մեծ կլինեն ոչ ավանդական մշակաբույսերի ցանքատարածությունները. սիսեռ, ոլոռ, եգիպտացորեն և արևածաղիկ: Նախարարությունը կտրամադրի սերմերի անհրաժեշտ խմբաքանակը: Ստացված բերքի իրացման հետ ևս խնդիրներ չեն լինի: Խոսվեց նաև ցանքաշրջանառության կիրառման անհրաժեշտության մասին:
Պլանավորվում է շրջանի նախալեռնային և ավելի բարձր գոտիներում իրականացնել խառը պտղատեսակների այգիների հիմնադրում, որի համար նախապատրաստական աշխատանքները կմեկնարկեն այս գարնանից:
Քննարկվեցին նաև անասնաբուծության ոլորտի խնդիրներն ու անելիքները: «Անասնաբուծության կանոնակարգման և արոտավայրերի կառավարման ծրագիր»-ն արդեն ներդրվել է շրջանի Շահմասուր համայնքում: Նախատեսվում է նույնն անել նաև շրջակա համայնքներում: Կշարունակվի նաև արհեստական սերմնավորման ծրագիրը:
Քննարկումները եզրափակվեցին ջրային ոլորտին վերաբերող հարցերով:
Այնուհետև Արցախի գյուղոլորտի ղեկավարներն այցելեցին Մարտակերի շրջանային անասնաբուժական սպասարկման կայան, որտեղ կոլեկտիվի հետ քննարկվեցին կայանի 2020 թվականի ծրագրային աշխատանքները:
