Աշխատանքային խորհրդակցություն ԱՀ ԳՆ-ում (Էռնա Ջավադյանը նշանակվել է ԱՀ ԳՆ աշխատակազմի ղեկավար)
27/07/2020
Հուլիսի 27-ին ԱՀ գյուղատնտեսության նախարար Աշոտ Բախշիյանն անցկացրել է աշխատանքային խորհրդակցություն, որի առանցքում էին նոր կորոնավիրուսի տարածման կանխարգելման միջոցառումներն ու պարետատան որոշումները, ԳՆ սննդամթերքի անվտանգության պետական ծառայության պետի հաշվետվությունը, կազմակերպական հարցեր:
Խորհրդակցության սկզբում Աշոտ Բախշիյանը գյուղոլորտի պատասխանատուներին է ներկայացրել ԳՆ նորանշանակ աշխատակազմի ղեկավար Էռնա Ջավադյանին՝ նրան մաղթելով արդյունավետ աշխատանք: Նախարարն ընդգծել է, որ աշխատակազմի նորանշանակ ղեկավարի մարդկային որակներն ու գործնականությունը կնպաստեն աշխատանքների արդյունավետ կազմակերպմանն ու կոլեկտիվում բարոյահոգեբանական մթնոլորտի էլ ավելի բարելավմանը, որ ոչ պակաս կարևոր է:
Հանրապետությունում իրականացված հակահամաճարակային միջոցառումների մասին հաշվետվությամբ ելույթ է ունեցել ԳՆ սննդամթերքի անվտանգության պետական ծառայության պետ Արթուր Ներսիսյանը: Նախարարը ՍԱՊԾ ղեկավարին հանձնարարականներ է տվել՝ հավելելով, որ անհրաժեշտ է այսուհետ ավելի հետևողական և ուշադիր լինել՝ շեշտը դնելով ԱՀ պարետի որոշումների դրույթներին համահունչ գործելու վրա:
Խորհրդակցությանն անդրադարձ է եղել նաև գործող կարգերի փոփոխության աշխատանքների ընթացքին:
