|
Եղանակի տեսությունը  |
ԱՀ գյուղատնտեսության նախարար Նորայր Մուսայելյանի շնորհավորական ուղերձը «Գյուղատնտեսության աշխատողի օրվա» առիթով
09/10/2022  Գյուղատնտեսության ոլորտի սիրելի ներկայացուցիչներ,Արցախի Հանրապետությունում 2011 թվականից հոկտեմբեր ամսվա երկրորդ կիրակին նշվում է որպես «Գյուղատնտեսության աշխատողի օր»:
Ջերմորեն շնորհավորում եմ ձեզ մասնագիտական տոնի կապակցությամբ: Մաղթանքս է, որ գյուղատնտեսությունը մեր երկրում դառնա նորարարական, բարձր շահութաբերություն ապահովող, մրցունակ ոլորտ:
Քաջատեղյակ լինելով մեր բնագավառում առկա դժվարություններին՝ բարձր եմ գնահատում յուրաքանչյուրիդ
քրտնաջան աշխատանքը և հիշեցնում, որ Արցախի Հանրապետության կառավարությունը, հաշվի առնելով գյուղատնտեսության դերն ու նշանակությունը մեր երկրի զարգացման և հասարակության բարեկեցության ապահովման գործում, հետևողականորեն շարունակելու է գյուղատնտեսության արդիականացմանն ուղղված ծրագրերի իրականացումը:
Մենք մեր հերթին արդեն ամրագրել ենք, որ ոլորտում նոր տեխնոլոգիաների, նոր գիտելիքի կիրառումը, ագրոբարեփոխումների լայն թափով իրականացումն այլընտրանք չունեն:
Կրկին շնորհավորում եմ «Գյուղատնտեսության աշխատողի օրվա» կապակցությամբ՝ երախտիքի խոսքս ուղղելով ֆերմերներին, գիտնականներին և գյուղատնտեսության ոլորտի բոլոր աշխատակիցներին՝ ամենօրյա նվիրված աշխատանքի համար:
Մաղթում եմ բոլորիդ քաջառողջություն և բարեբեր աշխատանք:
|
