ԱՀ կառավարության 2022 թվականի ապրիլի 26-ի N 470-Ն որոշման համաձայն, Արցախի Հանրապետությունում յուրաքանչյուր տարվա ապրիլ ամսվա վերջին ուրբաթ օրը այսուհետ կնշվի որպես անասնաբույժի օր:

Հետևաբար, այսօր Արցախում իրենց մասնագիտական տոնն են նշում ամենաանկեղծ, բարի, մարդասիրական և ամենապահանջված մասնագիտության տեր մարդիկ՝ անասնաբույժները։

Անասնաբույժի մասնագիտությունը ի հայտ եկավ դեռևս այն ժամանակ, երբ մարդը սկսեց ընտելացնել կենդանիներին և ապրել նրանց հետ կողք կողքի:

Մեր օրերում այս մասնագիտությունը շատ տարածված է, քանի որ առանց Ձեր բարձրակարգ մասնագիտական գիտելիքների ու հմտությունների չեն կարող գոյատևել ինչպես գյուղատնտեսական և ընտանի, այնպես էլ որոշ դեպքերում վայրի կենդանիները։

Որպես ոլորտի պատասխանատու և ինքս մասնագիտությամբ անասնաբույժ, պետք է ասեմ, որ արվում է հնարավորինս՝ Արցախում անասնաբույժի դերի կարևորման, այս չափազանց առաջնակարգ մասնագիտության պահանջարկի բարձրացման համար:

Առաջիկայում կհաստատվի Արցախում անասնաբուժական ծառայությունների մատուցման դիմաց նոր սակագների ցուցակը, որը հնարավորություն կընձեռի մեր մասնագետներին հավուր պատշաճին վարձատրվել՝ մասնավոր տիրույթում իրականացրած ծառայությունների դիմաց:

Նախատեսվում են անասնաբույժների մասնագիտական գիտելիքների և գործնական հմտությունների կատարելագործմանն ուղղված դասընթացների կազմակերպում:

Այս և այլ միջոցառումները կոչված են անասնաբույժի՝ առավել գնահատված և պահանջված լինելու ապահովմանը, ինչն, իհարկե, պետք է ուղեկցվի՝ մեր հանրությանը Ձեր բարձր մասնագիտական օգնության ցուցաբերմամբ:

Հատուկ ուզում եմ նշել 44-օրյա պատերազմի ժամանակ նահատակված մեր 2 գործընկերների մասին և խոնարհվել նրանց հիշատակի առջև:

Սիրելի գործընկերներ, շնորհավոր ձեր տոնը, մաղթում եմ բոլորիդ առողջություն, հաջողություններ և մասնագիտական վերելքներ: