Նախարարն ու Վ. Ավետիսյանը Մարտունու շրջանի վարչակազմի ղեկավար Է. Ավանեսյանի, վերջինիս տեղակալ Մ. Զարգարյանի և շրջանի գյուղբաժնի պետ Ռ. Վանյանի հետ հանդիպման ընթացքում կարևորել են ցանքսի աշխատանքները ժամանակին և ագրոկանոններին համապատասխան իրականացնելու անհրաժեշտությունը և քննարկել նախարարության կողմից գործող ծրագրերի պայմաններն ու նպատակահարմարությունը:

Այնուհետև նախարարը վերոնշյալ անձանց ուղեկցությամբ այցելել է Մարտունի, Բերդաշեն և Աշան համայնքների վարչական տարածքներում գտնվող աշնանացան հացահատիկային մշակաբույսերի դաշտեր և դիտարկել ցանքսերի վիճակը:

Ցանքսերի մեծամասնությունում առկա էր մկնանման կրծողների դեմ պայքարի անհրաժեշտություն, ինչը և շրջանի վարչակազմի ղեկավարի հրահանգով առաջիկայում կկազմակերպվի:

Նախարարի տեղակալի և գյուղբաժնի պետի տված գնահատականի համաձայն, ցանքսերի վիճակը որոշ տեղերում կարելի է որակել գոհացուցիչ, որոշ տեղերում՝ բավարար, իսկ որոշ տեղերում՝ անբավարար: Վերջինս պայմանավորված է նախևառաջ ագրոտեխնիկական կանոնների խախտմամբ մշակությամբ, ապա ոչ բարենպաստ բնակլիմայական պայմաններով:

Նախարարը եղել է նաև Բերդաշեն համայնքի վարչական տարածքի՝ մերձսահմանային գոտում կառուցվող ջրամբարի տարածքում՝ նախատեսված այստեղ հիմնադրվող ինտենսիվ պտղատու այգիների ոռոգման համար: