Մարտի 10-ին Նորայր Մուսայելյանն, ուղեկցությամբ տեղակալ Վիլեն Ավետիսյանի, այցելել է ԱՀ գյուղատնտեսության նախարարության ենթակայությամբ գործող «Բույսերի պաշտպանության ծառայություն» ՊՈԱԿ, որտեղ կազմակերպության տնօրենի՝ Սուրեն Շինդյանի մատուցմամբ ծանոթացել է 2021 թվականին ՊՈԱԿ կողմից իրականացված աշխատանքերին, հետաքրքրվել ընթացիկ տարվա մեջ նախատեսվող աշխատանքների ծավալով, քննարկել «ԲՊԾ» լաբորատորիայում հողի՝ էքսպրես հետոզոտության սարքերի ներդրման նպատակահարմարությանն ու Արցախում բույսերի պաշտպանության ոլորտում օգտագործվող թունանյութերի և պեստիցիդների տեսակային կազմին վերաբերող հարցեր:

«Հորդորում եմ բոլորիդ աշխատել ավելի մեծ եռանդով ու պատասխանատվությամբ, քանզի Արցախի և, ընդհանրապես, համաշխարհային տնտեսությանը սպառնացող ճգնաժամի պայմաններում մենք պետք է փորձենք գործի դնել մեր ողջ ներուժը և ապահովել առավելագույն արդյունք»,- ասել է նախարարը:

Այնուհետև Նորայր Մուսայելյանն այցելել է ԱՀ ԳՆ «Սերմնաբուծության, սելեկցիոն նվաճումների փորձարկման, պահպանության և սերմերի որակի ստուգման կենտրոն» ՓԲԸ, հանդիպել ընկերության աշխատակազմի հետ: Հանդիպման ընթացքում ընկերության տնօրեն Կարեն Ադամյանը ևս ներկաների ուշադրությանն է ներկայացրել ոլորտում կատարված և կատարվելիք աշխատանքները:

«Պարենային ինքնաբավության հետ կապված ոչ միայն Արցախին, այլևս աշխարհին սպասում են լուրջ մարտահրավերներ, ուստի մենք պետք է հետամուտ լինենք սերմարտադրության ոլորտում արտադրական ծավալների ավելացմանն ու սերմերի որակական բարձր հատկանիշների ապահովմանը»,- ընդգծել է Նորայր Մուսայելյանը:

Կ. Ադամյանը խոսել է լաբորատորիայի տեխնիկական հնարավորությունների ընդլայնման անհրաժեշտության մասին. խնդիրն, ըստ նախարարի, ուշադրության կենտրոնում է և նախարարության բյուջեի հնարավորությունների սահմաններում աստիճանաբար կփորձվի լուծում տալ դրան: