Նշանակվել է «Մարտակերտի շրջանի անասնաբուժական սպասարկման կայան»ՊՈԱԿ-ի նոր տնօրեն
17/02/2022
Փետրվարի 17-ին Արցախի Հանրապետության գյուղատնտեսության նախարար Նորայր Մուսայելյանն, ուղեկցությամբ տեղակալ Տիգրան Առստամյանի և նախարարության աշխատակազմի այլ ներկայացուցիչների, այցելել է «Մարտակերտի շրջանի անասնաբուժական սպասարկման կայան» ՊՈԱԿ՝ կազմակերպության նոր տնօրենի նշանակման կապակցությամբ:
Նախկին տնօրենը՝ Արա Հակոբյանը, պաշտոնից ազատվել է սեփական դիմումի համաձայն: Նախարարը նախ լսել է վերջինիս գործունեության վերաբերյալ տարեկան հաշվետվությունը, ապա ներկայացրել նորանշանակ տնօրենին.
«Սվետլանա Պետրոսյանը ոլորտի փորձառու և բարձրակարգ մասնագետներից է, հույս ունենանք նա իր գիտելիքներն ու հմտությունները կծառայեցնի շրջանի անասնաբուժության զարգացմանը: Անասնագլխաքանակի աճը յուրաքանչյուր շրջանում ուղղակիորեն կախված է անասնաբուժական սպասարկման մակարդակից, որն առաջիկայում էլ ավելի կբարձրացվի. այս գործընթացում ակնկալվում է ոչ միայն կազմակերպության տնօրենի, այլև յուրաքանչյուր աշխատողի ներուժի լիակատար ներդրումը»,- ընդգծել է նախարարը:
Հանդիպմանը ներկա է եղել նաև ԱՀ Մարտակերտի շրջանի վարչակազմի ղեկավար Արսեն Ավանեսյանը, ով պատրաստակամություն է հայտնել իր աջակցությունը ցուցաբերել ցանկացած այնպիսի նախաձեռնության, որը կնպաստի շրջանում գյուղատնտնեսության զարգացմանը: Նորայր Մուսայելյանն իր հերթին ևս կարևորել է վարչակազմի և նախարարության սերտ փոխգործակցության դերը՝ հաջողության հասնելու համար:
