|
Ամենօրյա  |
ԱՐԴՅՈՒՆԱՎԵՏ ԱՇԽԱՏԱՆՔԱՅԻՆ ԱՅՑԵԼՈՒԹՅՈՒՆ` ՉԵԽԻԱՅԻ ԵՎ ԳԵՐՄԱՆԻԱՅԻ ՀԱՆՐԱՊԵՏՈՒԹՅՈՒՆՆԵՐ
Արցախի գյուղատնտեսության կարևորագույն ճյուղերից մեկի` անասնապահության զարգացումը պահանջում է ոչ միայն ներքին ռեսուրսների, այլ նաև` զարգացած երկրների կողմից հնարավոր աջակցությունների նպատակամղված օգտագործում, առաջավոր փորձի ընդօրինակման միջոցով նոր տեխնոլոգիաների ներդրում: Ելնելով միջազգային չափորոշիչներից, զարգացած անասնապահություն ունենալու համար ընդհանուր անասնագլխաքանակի 15 տոկոսը պետք է կազմեն տոհմային անասունները, սակայն հանրապետությունում այն ընդամենը 0,7 տոկոս է: Ուստի, կարճ ժամանակահատվածում այդ մակարդակին հասնելը մեզ համար օրակարգային խնդիր է: Այդ խնդրի լուծման նպատակով տարեցտարի արտասահմանից ներ են կրվում տոհմային անասուններ: Այսօրվա դրությամբ արտասահմանից ներկրված անասունների քանակը կազմում է 266 գլուխ: Չնայած պատերազմական իրավիճակին ու Ադրբեջանի կողմից իրականացվող թշնամական քաղաքականությանը, ԼՂՀ իշխանությունները օգտագործում են ամեն մի հնարավորություն` արտասահմանյան երկրների հետ տնտեսական կապերի ստեղծման և ամրապնդման ուղղությամբ: Այդ առումով հատկանշական էին վերջին ամիսներին ԼՂՀ գյուղնախարարության կողմից վարած բանակցությունները, որի արդյունքում գործնական շփումներ ստեղծելու նպատակով Չեխիայի Հանրապետության ագրարային պալատի կողմից պաշտոնական հրավեր ստացվեց: Բանակցությունների, պաշտոնական հրավերի և այցի կազմակերպման գործում անգնահատելի մեծ դերակատարություն է ունեցել հայ ականավոր քաղաքական գործիչ Անաստաս Միկոյանի թոռը` Վլադիմիր Միկոյանը, որը Ռուսաստանի դաշնության առևտրա-արդյունաբերական պալատի ներկայացուցիչն է Արևելյան Եվրոպայում: Հենց այդ հրավերով էլ մայիսի 29-ից հունիսի 10-ը Չեխիայի և Գերմանիայի հանրապետություններում էր գտնվում գյուղատնտեսության նախարարի առաջին տեղակալ Աշոտ Բախշիյանը, ով անձամբ ծանոթ էր Վլադիմիր Միկոյանին և համատեղ ջանքերով կազմակերպել էին այդ աշխատանքային այցելությունը: |
